Nongstoiñ, Ïaïong 19
Ha ka sngi Saitjaiñ jong ka taiew, kawei ka arshaka kaba don ïa u registration number AS21-E-5628 ka la leit rung ha khrum kawei ka kali pick-up kaba wan pyrshah, ha kaba uwei u la khlad noh hashen katba uwei pat u la mynsaw jur.
Katkum ka tyllong khubor la ong ba katei ka jingjia ba sngewsih ka la jia ha ka por kumba 2 baje eiei nohphai sngi ha kawei na ki jaka jong ka surok Nongstoiñ-Riangdo ha shuwa ban poi ha Civil Hospital Nongstoiñ.
Ka khubor ka ong ruh ba ïa utei uba khlad noh hashen uba shong hadien jong ka arshaka la tip kum u Bah Dibarwell Marngar, kumba 38 snem ka rta uba dei na ka shnong Risiang, West Khasi Hills katba u nongñiah ka arshaka uba la mynsaw jur la tip kyrteng kum u Selestin Tympuin uba dei hi na kajuh ka shnong, bad la pynkit noh mar mar sha Civil Hospital Nongstoiñ ban phah sumar.
Ka khubor ka ong ruh ba katei ka jingjia, kala jia hadien ba kitei ki ar ngut kiba shong ha katei ka arshaka ki dang thmu ban leit sha Civil Hospital Nongstoiñ ban leit shim dawai hynrei ym shym la tip na kaei ka daw kaba la pynlong ïa ki ba kin poi ha katei ka apot.
U Sordar ka shnong Risiang u la ong ba kitei ki nongshong arshaka ki dei kiba shisur shidur bad kiba tip briew tip blei bha hynrei kaei kaba la jia ka lah ban dei tang na ka daw ka jingbakla ha ka jinglong briew bad u la pynpaw ruh ïa ka jingsngewsih kaba jur.
