Jowai, Ïaïong 19
U Myntri ka tnad Sports and Youth Affairs ka Sorkar Jylla u Ma Wailadmiki Shylla u la pynbna ban tei sa ïa ka Youth Hostel ha Multi Sports Complex, Wahiajer khnang ban pynsuk ïa ki samla ïalehkai haba ïadei bad ki jaka sah jaka dem.
Ïa kane u Ma Wailad-miki Shylla u la pynbna haba kren ha ka jingïalang plie bad buh mawnongrim ïa ki 6 tylli ki skhim pynroi hapoh ka Nartiang Konstitwensi bad Jowai Konstitwensi ha ka jingïalang kaba la long ha shnong Wahiajer ha ka 18 tarik Ïaïong.
U Ma Wailadmiki u la pyntip ruh ba ha ka National Games-2027, ka Wahiajer kan dei kawei ka ban pdiang ban pynlong ïa ka National Games.
Haba kren halor ka roi ka par, u Ma Wailadmiki u la ong, haba ka Sorkar ka wanrah ïa ki kam pynroi, ka wanrah da ka jingthmu ban kyntiew ïa ka ïoh ka kot, ka kamai kajih, bad ka ïohkam ïohjam khnang ba ka thong ban ïoh ïa ki kam pynroi kin urlong bad ban lah ban weng ïa ka jingduk jingkyrduh, jingsahdien bad kumta ter ter.
U Ma Wailadmiki u la kren ruh halor ka kam sain hima sima da kaba ong, ka Rilum Jaiñtia ka dei ka thaiñ kaba ai jingkyrshan pura ïa ka Sorkar MDA da kaba ai nuksa ba ha u snem 2018 na ki 7 ngut ki MLA, 6 ngut ki don bad ka Sorkar MDA-1 bad ha u 2023 baroh ki 7 ngut ki MLA ki don bad ka Sorkar MDA-II.
Haba u shong pyrkhat marwei, u la ong lada jia ba ka Sorkar MDA kan nym ïoh shuh ban synshar, hato kiwei ki Sorkar ki ban shimti hadien, tip nangno kin leit wad pisa ban maramot ïa ki surok ba la shna da ka Sorkar MDA.
U la ong, ka roi ka par ka long kaba kongsan bha ryngkat ruh bad ki nongmihkhmat kiba lah ban trei bad nang ban pynïadei naduh na Delhi, ha Jylla haduh konstitwensi khnang ban tuid ka roi ka par bad kiew ha baroh ki liang.
U Ma Wailadmiki Shylla u la kyntu ruh ïa u Bah Prestone Tynsong ba un ïai bteng ban ai jingkyrshan ïa ki konstitwensi ka rilum Jaiñtia khamtam ki konstitwensi ha East Jaiñtia.
