Shillong, Ïaïong 19
U Bah Disparsing Rani uba dei uwei uba ju wad jingtip lyngba ka Right To Information (RTI) u la pynpaw ba ka jingwan ka Five Star Luxury Hotel kaba la tip kum Taj Umiam Resort & Spa kan long ka jingmyntoi ïa ki khun samla.
Katkum ka durkhih ba la pyllait da ka tnad shangkai pyrthei jong ka Sorkar Jylla, u Bah Disparsing u la ong baroh ki kmie ki kpa ki phah pule ïa ki khun ban ïoh kam hynrei kam mut ban ïohkam Sorkar namar kiba ïoh kam Sorkar ki don tang lai percent, kiba trei kum ki contractor ki don tang ar percent bad kumba 80 percent ki dei kiba wad ïa ka jakpoh lajong.
U la ong ka jingwan katei ka hotel ka jingïohnong ïa ki nongrep namar ki nongwankai pyrthei ki kwah mad ki jingbam tynrai nangne napoh jylla. Ha jaka ban leit sha ïew ne ban shalan shabar hynrei da ka jingdon kine ki hotel la lah ban die sha kine ruh.
Shuh shuh u la ong ba ka jingïohnong ïa ki nongñiah taksi kiba lah ban kit ïa ki nongjngohkai pyrthei ban leit sha katei ka jaka sah.
U la ong ba ki samla kiba donsap ban rwai, kiba nang ban thaiñ kriah, kiba donsap ban khem kiba nabar ki kwah ban sngap ne ban tip ïa ki sap nangne na jylla.
U la pynpaw ruh ba ka Taj hotel kam kwah ban wan ha ki jaka sor hynrei ka leit sha jaka ba don ki wah namar ka don la ka jong ka jingïohnong ym dei ma ka pat ban batbor ïa ka wah hynrei ka jingïohnong namar ka ai jinghikai kiba bun jait kum ka jingñiah lieng namar u la dep ïohi haba u la wankai sha Goa.
U Bah Disparsing u la ong ba ka Sorkar Jylla ka la pynshlur ban ri dohkha kaba ka dor ka long shi hajar bad khadsanspah shi kilo te ïa kine ki dohkha shano kin die namar kiba napoh ka jylla kin nym lah ban bam ïa kine ki dohkha kiba remdor lyngba kine ki hotel yn pynïaid lada wan ki nongjngohkai pyrthei.
Haba kren ïa ka jingjaboh hynrei u la phai sha ka Mawlynnong kaba ki nongjngohkai pyrthei ka khring namar ka jingkhuid hynrei u la pynksan ba kam don ka hotel ban kwah duhnong ka hap ban ïohnong kumta donkam ban pynkhuid.
Kumban shu pynkynmaw ba kane ka jingkyrshan u Bah Disparsing Rani ka dei namar ka dang ïaid ka jingïakhih ka Green Tech Foundation ban dawa ban pyndam ïa ka jingïasoi bad katei ka company ban shna hotel ha u Lumpongdeng.
