Jowai, Ïaïong 19
“Nga la ong ïa u Myntri Rangbah ka Jylla Conrad K Sangma ba lada ym pdiang ïa ka projek Lumpongdeng, rah noh sha ka shnong Wahiajer kaba pdiang lut ïa baroh ki kam pynroi,” ong u Symbud Myntri Rangbah ka Jylla u Bah Sniawbhalang Dhar.
Ïa kane u Bah Sniawbhalang u la ong haba ai jingkren ha ka jingplie bad buh mawnongrim ïa ki skhim pynroi bapher bapher hapoh ka Nartiang bad Jowai Konstitwensi ha ka jingïalang kaba la long ha Wahiajer ha ka 18 tarik Ïaïong.
Haba kren halor ka jingïakhih ba dang ïaid jong Green Tech Foundation, u Bah Sniawbhalang Dhar u la ong, dang don kiba shah thngan na ka bynta ka roi ka par bad don ruh kiba shah thngan ban pyrshah ïa ka jingwanrah ïa ka roi ka par, kane ka dei rukom synshar paidbah ne democracy.
“Nga la ong ïa u Myntri Rangbah ka Jylla, lada ym pdiang, rah noh sha Wahiajer kaba pdiang lut ïa baroh ki kam pynroi,” u la ong.
Katba u Symbud Myntri Rangbah Bah Prestone Tynsong u la ong, “Haduh mynta ngi ïohi, ki don ki samla ka Green Tech Foundation (GTF) ki dang bteng ïa ka jingïakhih. Ngm lah ban khang, bad ngim lah ruh ban pynbor hynrei na ka liang ka Sorkar kaba ngi don ban ong bad ïai ban ba ka jingkhang ka plie na ka bynta ban ïakren”.
Haba pynshai halor ka jingshah kynnoh ba ka Sorkar ka kwah die ïa ka jaka, u Bah Prestone u la pynshai da kaba ong, “Ngan ïathuh ïa phi, kato ka projek kaba jia mynta, baroh phi la ïatip lut ka dei ha ka jaka Sorkar, hynrei lada don kano kano ka jingthut ka jingwit ngi long kiba kloi ban pynshai. Ngim shym la ïasoi ïa ka MoU haba rieh, hynrei ka don ha ka website bad ki kyndon kiba la buh.”
U la khot ruh ka jingïatreilang jong baroh ki nongshong shnong ka Jylla khnang ba ka Meghalaya kan dei kawei na ki jylla kaba ki nongjngohkai ym tang napoh ri India hynrei na kylleng sawdong ka pyrthei kin ieid ban wan ban pyllut ïa ki sngi shuti ki jong ki hapoh ka jylla.
