Nongpoh, Ïaïong 19
Uwei u samla u la duh ei noh ïa la ka jingim hadien ka jingshah rong bad ngam jyllop ha ka wah Umtrew kaba don harud ka surokbah National Highway 6 ha Umran Dairy katba u dang leit ban sum ryngkat bad ar ngut ki paralok ha ka step sngi U Blei kaba la jia ha ka por kumba 8:30 eiei.
Katkum ka tyllong khubor ba ïohlum, la ïathuh ba utei u samla u dei uba la tip kyrteng kum u Elias Kurbah na ka shnong Mawiongrim, Shillong. La ïathuh ruh ba kitei ki ar ngut ki paralok kiba ïadon lang ha katei ka por, ki la ïaleh bad pyrshang ban ïarap ïa utei u samla, hynrei kim lah eiei shuh.
Ïa kane ka jingjia la pyntip noh sha ki bor pulit ka thanad Umsning kiba la pyntip pat sha ka Search & Rescue Team (SRT) Shillong bad ka tnad Fire & Emergency Service (F&ES) ka Nongpoh. Lyngba ka jingwanpoi kloi jong ki bor pulit ka F&ES Nongpoh la lah ban sei noh ïa ka met utei u samla na katei ka wah.
