Shillong, Iaïong 19
Ki paidbah na kylleng ki jaka ha ka sngi u Blei, ki la wan ban ai ka jingkyrshan ha ryngkat ka jingduwai na ka bynta ka jingshah thngan jong u Secretary General ka GTF, u Bah Ritre ha madan Malki.
Ka jingshim rai u SG ka GTF ban bteng ïa ka jingshong shha thngan ka dei hadien ba ki doktor ki la rah noh ïa u Chairman ka GTF, u Bah HB.Nonglang sha hospital namar ba la jur palat ka jingshitom ha ka met jong u bad ka bym long shngaiñ shuh bna dangbteng ka jingshah thngan.
Ka jingshah thngan jong u Secretary General ka GTF ka la ïaid mynta la ar sngi lynter ha madan Malki.
La sakhi ïa ka jingwan tuid ki paidbah ha ka jaka shah thngan u Secretary General ha madan Malki ha ryngkat ban buh ruh ha ki jingduwai ba u Blei un ai ka bor ha u, bad ba ka Sorkar kan sngap ïa kaei ba ki la dawa.
Nalor ka jingshah thngan jong u Secretary General, ka Kong Mirajones, President ki ASHA ruh ka la shongshah thngan lang ha ka tei ka jaka kum shibynta ban pynpaw ïa ka jingai ka jingkyrshan halor ka jingdawa ka GTF.
La ïohi ruh kiba la wan ai jingkyrshan ym tang kiba la Rangbah ne Samla hynrei naduh ki hep kiba rit ki la wan sha madan Malki ban kyrshan bad ban kitbok ïa u Bah Ritre u nongïalam ka GTF uba la shim ïa ka sienjam shah thngan.
Lah ban kdew ba ka jingïakhih ka GTF ka dei halor ka jingdawa na ka Sorkar Jylla ba ka dei ban wengnoh ïa ka projek ha Lumpongdeng kaba la ai wai sha ka kompani ban tei ïa ki Taj Resort & Spa, kaba lah ruh ban ktah ïa ka jingitynnad ka Lumpongdeng bad ka jingktah nyngkong ïa ka mei mariang.
Ka jingïakhih jong ki nongïalam mynta ka la ïaid la 2 taïew duna ei-ei hynrei ka Sorkar pat haduh mynta kam shym la pat ai kano-kano ka jubab haba ïadei bad katei ka jingdawa.
