Shillong, Ïaïong 20
U Bah Wallam Nongsiej, Nongaibuit ka Green Tech Foundation (GTF) u la ïathuh ba u Chairman ka GTF u Bah H Bansiewdor Nonglang u dangbteng ïa ka jingshah thngan khlem buh por ha hospital.
Ka jingshah thngan u Bah H Bansiewdor Nonglang ka la ïaid la 12 sngi lynter, ha kaba um shym la kwah ban bam bad dih bad wat tang ban dih dawai ha hospital namar u la rai ban shah thngan beit, katba ka Sorkar kam pat ai kano-kano ka jubab halor ka jingdawa ka Foundation. U la ïathuh ba u Bah H Bansiewdor Nonglang u la kwah ban wan biang sha madan Malki ban bteng ka jingshah thngan hynrei u hap ban shah sumar shuwa ha hospital namar ba ka la jur palat ka jingshitom ha ka met. Haba ïadei bad ka koit ka khiah jong u Bah Ritre u Bah Wallam u la ïathuh ba ka koit ka khiah ka dangbiang hynrei ki doktor pat ki pyntip ba u la duna ka shini ha ka met.
U Bah Wallam u la ong ruh ba u Chairman ka GTF mynta u la sdang ïoh bor hynrei ka bam pat um treh ban bam ne dih dawai. “Watla ka met ka tlot hynrei ka mynsiem jong ka jingïaleh ka shitrhem tad haduh ba ka Sorkar kan jubab ïa ka jingïakhih ka Foundation,” la bynrap u Bah Wallam.
Haba kylli, u Bah Wallam u la ïathuh ba kam shym don kano-kano ka daw halor ka jingpynkynriah noh ïa u Chairman na Civil sha Woodland hospital hynrei ka dei ba un ïoh ka jingsumar kaba biang.
