Shillong, Ïaïong 20
U National Secretary ka BJP bad Meghalaya ‘In-charge’, u Anil Antony ha ka Lah Sngi U Blei u la ong ba ka BJP kan sa long ka seng kaba don ïa ka bynta kaba khraw ha Meghalaya ha u snem 2028 bad kan ïai bteng ban pynïar ïa ki dienjat jong ka ha kylleng ka Thaiñ Shatei Lam Mihngi.
“Ha u snem 2028, phi lah ban khmih lynti ba ka BJP kan long ka seng saiñ pyrthei kaba don ïa ka bynta kaba khraw wat ha ka Jylla Meghalaya kumjuh,” ong u Antony ha ki nongthoh khubor.
Ha kajuh ka por, u la kdew ïa ka jingnang kiew jong ka seng ha kane ka thaiñ ha kine ki khyndiat snem ba la dep.
“Ha kine ki khyndiat snem ba la dep, ha kylleng ka Thaiñ Shatei Lam Mihngi, ka BJP ka la nang pynïar ïa ki dienjat jong ka. Bun snem mynshuwa ha NE, ka seng kam shym la don wat tang kawei ruh ka shuki ne ‘Seat’. Mynta, 7 na ki 8 tylli ki Jylla la synshar da ka NDA kynthup ha Meghalaya”, u la ong.
“Ha ki 4 tylli ki Jylla, ka BJP ka dei ka seng kaba bun paid eh ba kynthup ïa ka Assam, Arunachal Pradesh, Manipur bad Tripura bad ha kiwei pat ki Jylla, ka seng ka la nang pynïar shuh-shuh ïalade. Kumta, phin sa ïohi ba ka seng kan nang pynïar shuh-shuh ïalade bad kan sa ïoh kham bun shuh ki nongmihkhmat hangne,” la bynrap u Antony.
Halor ka jingangnud jong ka seng ha ka Jylla, u la ong, “Kumba long ha kiwei pat ki Jylla, ka seng ka angnud ban long kaba nyngkong eh ne ‘Number One’ ha Meghalaya kumjuh.”
Haba kylli halor ka jingpynkynriah ïa ka ilekshon sha ka Garo Hills Autonomous District Council (GHADC), u Antony u la ong ba ka BJP ka long kaba la khreh ban leit sha ka ilekshon bad ka khmih lynti ban pynbha ïa ki jingkheiñ jong ka ha ka jingjop ki kyrtong.
“Ngi sngewskhem shi kat dei. Ïa ka ilekshon ADC ha Ri-lum Garo la pynkynriah noh hynrei ka BJP ka la pynkhreh pura na ka bynta ka ilekshon hashuwa ban jia kiei-kiei. Ngi dei kawei na ki seng banyngkong eh ban pynbna kyrtong na ka bynta katei ka ilekshon”, u la ong.
“Na ki 29 tylli ki ‘Seat’, ngi la pynbna kyrtong ha jan baroh ki konstitwensi, lait noh 3-4 tylli bad ki kyrtong jong ngi ki la sdang ïa ka jingtreikam jong ki. Ha ka ilekshon kaba la dep, ngi la ïoh jingjop ha 2 tylli ki konstitwensi. Ha kane ka kynti, ngi tikna ba ngin sa kiew ha ka jinglehbha jong ngi”, la ong u Antony.
