Shillong, Ïaïong 20
U Bah Wailadmiki Shylla Myntri ka Sorkar Jylla u la pynthikna ba ka Sorkar kan nym ktah ban tei ïa ki jingtei ha dewlynnong Lumpongdeng bad ka Sorkar kan wengnoh ïa ka projek ha Lumpongdeng.
Ïa kane u Myntri u la kren sha ki lad pathai khubor ha ka sngi Nyngkong jong ka taïew hadien ba na ka liang ki nongïalam ka GTF ki la ïakhih halor ka jingthmu ka Sorkar ban tei ïa ki jingtei ha dewlynnong Lumpongdeng.
U Bah Wailadmiki u la ong ba ka Sorkar Jylla kan pynurlong kumba la thmu ban tei ïa ki jingtei ha Orchid Umïam katba ha Lumpongdeng pat la pynthikna ba kan wengnoh mardor bad kan nym don kano-kano ka jingtei ha katei ka jaka.
U la ong “Ha ka jingïakren bad ka Synjuk ki Rangbah Shnong na them Ri Bhoi, ki la ong ba ki kwah ïa ki jingtei ha Orchid Umïam hynrei ïa ka projek ha Lumpongdeng pat dei ban wengnoh”.
“Naduh ba sdang ka Sorkar ka la dep ban pynshai ba ha ka Soskular ruh ka la ong ban nym ktah eiei ïa ka dewlynnong Lumpongdeng,” la bynrap shuh shuh u Myntri.
