Shillong, Ïaïong 20
U Nongïalam ka BJP bad MLA ka Pynthorumkhrah u Bah AL Hek u la kam ba ki don katto katne ki MLA ba mynta bad ruh ki MLA barim kynthup ki MLA bad MDC na ki seng saiñpyrthei ba ki la pynpaw ïa ka jingkwah jong ki ban pynïasoh noh bad ka BJP.
“Nga la ïakynduh ïa kiba bun ki nongïalam bad ki nongïalam barim jong ki seng saiñpyrthei bapher bapher, kiba dei ruh ki MLA kiba mynta bad kiba rim bad ki MDC, kiba kwah ban wan ïasoh bad ka BJP. Ki la dep ban ïakren bad kiba bun ki nongïalam jong ka BJP ba ki kwah ban pynïasoh noh bad ka seng,” la ong u Bah Hek haba kren bad ki nongthoh khubor.
Halor kane, na ka liang jong u Bah Hek um pat kwah satia ban pynpaw ïa ka kyrteng jong kine.
“Ngan nym pat pynpaw ïa ka kyrteng jongno jongno ruh. Sngewbha ïai ap tad haduh ba kine ki nongïalam kin sa pynïasoh pura bad ka seng,” u la ong.
Haba kynthoh halor ka jingpynïar shnat treikam jong ka Voice of the People Party sha Rilum Garo, u Bah Hek u la ong, kane ka dei ka bynta kaba ju leh da ki seng saiñpyrthei.
“Baroh ki seng saiñpyrthei ki ju thaw ïa ki unit jong ki, ha kylleng ki bynta jong ka Jylla Meghalaya, lada ki kwah ban jop bun ngut ki MLA. Ka dei ka kamram ka jong ki bad ka jingkitkhlieh ka jong ki. Ngam don eiei ban ong pyrshah ïa kiwei ki seng saiñpyrthei,” u la ong.
