Shillong, Ïaïong 20
Ka mat ïakren ki briew ha kine ki khyndiat sngi haba ïadei ka dewlynnong Lumpongdeng kaba don hapdeng jong ka pung Umiam ka dei kaba la thnem bha, namar ka jingïakhih ki nongïalam ka Green-Tech Foundation da kaba shah thngan khlem buh por ha Madan Malki.
Ka jingïakhih jong ki nongïalam ka GTF ka dei halor ka jingthmu jong ka Sorkar ban aiwai 60 snem ïa ka dewlynnong Lumpongdeng sha ka kompeni.
Haba ïadei kane ka mat ka Sorkar Jylla lyngba u Myntri Rangbah u Conrad K Sangma bad u Symbud Myntri Rangbah u Bah Prestone Tynsong ha ki khyndiat sngi ba la dep ki la ai jingpynshai ba kan ym don kano-kano ka jingtei ba neh ha ka dewlynnong Lumpongdeng, hynrei na ka liang ka GTF ka la dawa ba ka Sorkar ka dei ban pynduh pyndam noh ïa ka soskular ba ka Sorkar ka la ïasoi bad ka kompeni.
Na ka liang U Nongsaiñ Hima ha ka lah Sngi u Blei u la hiar ban leit peit ïa ka jinglong jingman ha Lumpongdeng, ha kaba la lap ba ka la don ka jingpynkhyllem ïa ki dieng kiba don ha katei ka dewlynnong.
Ban poi sha katei ka dewlynnong hap ban shong da ka lieng, lada shong da ka ‘motor boat’ ka shim por hapoh 5 minit bad lada shong da ka lieng kynda pat kan shimpor kham slem ha katei ka dewlynnong. Ka jingjngai na Orchid Lake Resort ka don kumba 500 metre eiei ban poi shaduh Lumpongdeng.
