Mawkyrwat, Ïaïong 20
Ka Nongjri Trade Welfare Association (NTWA) kynhun jong ki trai shnong trai jaka jong ka thaiñ Nongjri ha ka 20 tarik u Ïaïong, 2026 ka la pynlong ïa ka jingïalang ha Nongjri ha kaba ïadei bad ka jingmih ki kynrum kynram bad bym sngwthuh jingmut hapdeng ki artylli ki kynhun kata hapdeng ka Meghalaya Commercial Truck Owners Driver Association (MCTODA) bad ka South West Khasi Hills Truck Owners Driver Association (SWKHTODA) ha kaba ka la don ruh ka jingkhang kali ban leit kit ïa u coke na ka thaiñ Nongjri la jan shibnai.
Ha kaba ïadei bad kane, ka Nongjri Trade Welfare Association ka la pynpaw ïa ka jingsngewkhia kaba jur namar ka jingsangeh ban kit ïa u coke ka la ktah shisha ïa ki paidbah kane ka dong ka thaiñ bad ïa ki trai karkhana.
U Bah Mandilos Nongbri, President ka Nongjri Trade Welfare Association haba kren sha ki lad pathai khubor u la ong ba ka seng hadien ba la wai ka jingïalang da kawei ka jingmut ka la rai ban pdiang ïa ka jingpynïaid da u serial number ha kaba ïadei bad ka jingkit ïa u coke.
U la ong ruh ba kim lah ban khang ïa ki kynhun bapher bapher kiba wan bylla sha kane ka dong ka thaiñ da kaba bynrap “Ïoh lehse don ki trai shnong lashai la shisngi kin seng kynhun lajong bad kin pan bhah bad kiwei ki kynhun ruh kin pan bhah bad kane ka jingpan bhah kan wanrah ïa ka jingkulmar,” ong u Bah Mandilos.
Kumta na ka liang ka Nongjri Trade Welfare Association ka ïeng ha ka nongrim ba la don katno katno tylli ruh ki kynhun kiba wan bylla sha Nongjri kin pdiang beit ïa baroh bad ki dei ban ïaid beit katkum ka serial number.
U Bah Mandilos Nongbri u khot u wer ïa ki artylli ki kynhun ba kin ïasuk noh bad ba kin bteng biang ïa ka jingbylla kit coke sha ka thaiñ Nongjri bad ba ki dei ban ai noh ïa ki kyrteng bad number jong ki kali jong ki, khnang ba ka Association kan ïoh ban pynïaid noh da ka serial number ha kine ki sngi ki ban wan bad u la maham ruh ba lada don kino kino kiba pynkheiñ ïa ka jingpynïaid da u serial number kumba long ha ki por ba la dep, ka jingkitkhlieh ka dei ban shim hi da u trai kali, u nongñiah bad kita ki trai karkhana.
