Shillong, Ïaïong 20
Ha ka janmiet jong ka sngi Nyngkong ka 20 tarik mynta u bnai, ka la don ka jingjia jong ka jingtwa u lum maw ha Mawlieh, ka bynta jong ka surok Shillong-Dawki, ha kaba kawei ka kali Bolero ka la pra phom hadien ba ka la shah ban ha ki maw heh kiba hap jrain halor jong ka kali.
Katkum ki khubor kiba la ïoh la ong ba haduh mynta ym pat lah ban tip katno ngut ki briew kiba don hapoh katei ka Bolero kaba don ïa u registration number ML05-AD-5514 hynrei la suba jur ba ki la khlad haba peit ïa ka jinglong jingman jong ka kali.
Kane ka jingjia ka la jia ha ka por kumba 5.30 eiei janmiet, ha ka por ba katei ka kali ka dang don ha lynti na Shillong ban hiar sharum Pynursla.
Ki bor ka kompeni kaba pyntrei ïa katei ka bynta surok kaba dei na ka projek surok Shillong sha Tamabil ki dang ïaleh ban weng ïa u mawheh uba ban najrong ïa katei ka Bolero Pick-Up da kaba pyndonkam da ki bor machine.
Katkum ka video bad ki dur kiba la saphriang ha ki rynsan Social Media la pyni ba uwei na kiba don hapoh ka Bolero um lah khih shuh bad mih snam kaba la kynshait ruh shalor kali bad halor maw.
Shuh shuh ka tyllong khubor ka ïathuh ba haduh mynta ym pat lah ban tip la ka dei tang katei ka kali kaba la shah ban maw ne ki dang don sa kiwei pat bad kiei kiei baroh kin sa lah ban shai tad ynda la dep ban pynkhuid ïa kitei ki maw bad ka khyndew.
