Shillong, Ïaïong 21
Ka Hynñiewtrep Integrated Territorial Organization (HITO) Shillong City hapoh ka jingïalam u Samla Pynshngaiñ Nongrum, Organizing Secretary bad ha ka jingdonlang u President ka Mylliem Circle ryngkat bad ki dkhot ha ka sngi Ba-ar, ka 21 tarik u Ïaïong 2026, ki la beh krad ïa ki bar jylla na Umshyrpi kiba thmu leit trei bylla sha Pynursla khlem ki kot ki sla kiba biang.
Ka HITO ka lap ïa kine ki bar jylla dei hadien ba ki la ïoh ka jingujor na ki paidbah ba don ki bar jylla ba wan ha Umshyrpi ki bym biang ki kot ki sla.
Kine ki bar jylla ki don haduh 8 ngut bad na ka liang ki dkhot ka HITO ki la mareh bran-bran bad ynda poi ha Umshyrpi ki lap ba kitei ki bar jylla kim don shisha ïa ki kot ki sla kiba biang bad haba la kylli, ki bar jylla ki ïathuh ba ki thmu ban leit trei sha Pynursla.
Kumta ka HITO ka la beh noh ïa ki bar jylla sha ka jaka ba ki wan, da kaba maham ruh ba kim bit ban wan rung ne wan trei sha ka Jylla khlem da pynbiang shuwa ki kot ki sla kiba biang kum ki Labour Licence bad ki Police Verification.
