Shillong, Ïaïong 21
Ka Sorkar Jylla kala bthah ban pynlong da ka jingtohkit halor ka jingjia twa ki maw hajan Mawlieh, kaba la shim ïa ka jingim jong ki arngut ki briew ha ka sngi Ba-ar, ha kaba u Symbud Myntri Rangbah ka Jylla Bah Prestone Tynsong ula bthah ïa ki bor district, pulit bad ïa ka National High-ways and Infras-tructure Develop-ment Corporation Ltd (NHIDCL) ba kin khmih bniah ïa kaei kaba lam sha katei ka jingjia ka ban long bniah bha.
“Ka long shisha ka jingjia kaba sngewsih kaba la jia ha ka sngi Nyngkong, ha kaba ar tylli ki mynsiem briew ki la duh noh namar ka jingjia ba ki mawbah mawsan kila tyllun bad hap ha kawei ka kali pick-up bad kitei arngut kila khlad noh ha shen,” ong u Bah Prestone ryngkat bad ka phah ïa ka jingsngewlem sha ki bahaïing jong kine kiba khlad noh.
Ki arngut kiba la khlad noh ha katei ka jingjia, ki dei kiba la tip kyrteng kum u Wanbor Nianglang, 40 snem ka rta na Pynursla bad u Nangteibor Khongthohrem, 46 snem uba na ka shnong Lumwahniai. U Bah Prestone u la ong, ba u la bthah ba dei ban pynlong noh mardor ïa ka jingtohkit halor katei ka jingjia.
“Hynnin ka sngi hi, nga la bthah ïa u SDO Civil bad ïa ka kynhun jong ki pulit hapoh ka jingïalam jong u SDPO Pynursla. Nga la kren bad bthah ruh ïa ka NHIDCL ryngkat bad ka kynhun ka jong ka bad wat ïa ka kompani kaba pyntrei ïa ka projek jong ka Package-II ba kan khmih bniah biang halor ka jinghap jong ki mawbah mawsan kaba la lam sha ka jingïap jong ki arngut ki briew,” u la ong.
Halor katei ka jingjia, ha ka sngi Ba-ar ka la don ka jingleit jurip lang hapdeng ki ophisar na ka tnad PWD bad ki bor pynïaid district.
“Nga la bthah bad hynne ka sngi kila leit kum ka kynhun baroh kawei naduh na ka kyrdan jong u Executive Engineer, kila leit shatei bad ha ka jingdonlang jong SDO Civil, BDO bad ruh ki nongïalam bapher bapher bad dei halor kane ba ngi la rai ba dei ban khang shwa shipor ïa kane ka surok kaba lah ban long 2-3 sngi,” ong u Bah Prestone.
U la kyrpad ïa ki paidbah ba kin ai ïa ka jingïatreilang ha ka por ba khang ïa ka surok.
“Da ka jingsngewrit, nga kyrpad ïa baroh kiba don bynta, khamtam eh ïa ki paidbah na ka konstitwensi jong nga, ba kin long kiba shah shitom shipor bad ngi, mynta ngi kwah ban phaikhmat sha ka bynta khamtam ïa kaba ym shngaiñ ha kaban ïaid lyngba ha katei ka jaka. Kumta nga kwah ban kyrpad ïa baroh ki paidbah jong ka thaiñ Pynursla ban sngewbha ban ïatreilang bad ngi bad ai ba ki bor pynïaid district kin shimkhia halor kane ka mat,” ong u Bah Prestone.
Ha kaba ïadei bad ki sienjam ban lah pynbeit shirta ïa kane ka kam, u la ong ba mynta kin dang donkam ban shim shuh shuh ïa ki jaka.
“Mynta ngi la shim ïa ka rai ba donkam ban shim shuh ïa ki jaka hynrei na ka bynta kane ngam pat ïoh satia ïa kano kano ka jingtip kaba thymmai hynrei ka rukom pyrkhat ka long ba ngin shim shuh ïa ki jaka ha katei ka bynta, khnang ba yn lah ban pynkhuid baroh shi syndon ïa ka jingtwa khyndew,” u la ong.
