Shillong, Ïaïong 21
U Symbud Myntri Rangbah ka Jylla ba khmih ïa ka tnad Transport Bah Sniawbhalang Dhar ha ka sngi Ba-ar, u la pyntip ba ka Airport Authority of India (AAI) kala dep ban ai tender ban pynheh ïa ka Shillong Airport bad la khmih lynti ruh ba ka jingpyntrei ïa ka projek kan sa sdang noh shen.
“Ïa ka tender la dep ban ai na ka bynta ban pynheh ïa ka Kad Liengsuiñ. Lehse u kontraktor un sa sdang noh shen ïa ki kam,” ong u Bah Sniawbhalang haba ïakren bad ki lad pathai khubor.
Haba kylli halor ka jinglong jingman ba mynta jong kane ka projek, u Bah Sniawbhalang u la ong, “To ngin peit. La ïohi ba ka por ba u kontraktor un pyndep ïa ka kam, ka long 18 bnai,” bad bynrap ba u la pan ruh ïa ka jingtip ba pura shaphang u kontraktor bad ki plan ba thmu ban pyntrei.
“Nga la bthah ïa u Commissioner of Transport ba un ïakren bad ki naba ngi kwah ban tip mano ba dei u kontraktor bad kiei ki kam ba un pyntrei. Lehse ha u bnai ban wan, ngin sa tip mano ba dei u kontraktor, kaei ka dor ba ki buh, bad kaei ka por ba kin pyndep,” u la bynrap.
