Shillong, Ïaïong 21
U Symbud Myntri Rang-bah ka Jylla, u Bah Sniawbhalang Dhar ha ka Sngi Ba-ar u la ong ba ka jingthmu jong ka Voice of the People Party (VPP) ban pynlong ïa ka jingïakhih paidbah halor ki mat bapher-bapher kynthup ïa ka projek dewlynnong Lumpong-deng ka don jingïadei bad ka jingïalap ilekshon shiteng samoi sha ka Shillong Lok Sabha.
“Ka jingïakhih paidbah jong ka VPP ka dei namarba ki la sdang ban ïalap na ka bynta ka ilekshon shiteng samoi sha ka Shillong Lok Sabha. Ngi ruh ngin sa sdang ïa ka jingïalap ilekshon jong ngi lehse ha u bnai ban wan,” la ong u Bah Dhar haba kren sha ki nongthoh khubor.
Haba kdew ïa ka rai jong ka Sorkar Jylla ban pyllait noh ïa ka dewlynnong Lumpongdeng na ka projek Taj Resort & Spa, u la ong, “Ka jingkren jong u Symbud Myntri Rangbah bad Myntri Sorkar Jylla, Bah Wailadmiki Shylla ka long kaba shai bad thik ka la urlong kumta hi.”
Haba kylli la ka VPP ka thmu pynkylla sohpdung ïa ka NPP, u Bah Dhar u la ong, “Em, man la ki seng saiñ pyrthei ka dei ka kamram jong ki ban ïalap na ka bynta ka ilekshon shiteng samoi, lehse ki kwah ban pyndonkam ïa ka (kane ka mat) kum ka mat ilekshon, kata ka shong ha ki.”
Halor ka jingtyrwa ba hashuwa jong u ban pynkynriah noh ïa katei ka projek ‘Hotel 5-Star’ (ha Umïam) sha Wahiajer lada don kiba jingpyrshah, u la ong, “Phi ïohi, ngi ju pdiang sngewbha beit ïa ka roi ka par. Naba mynta ka Sorkar ka la sngap ïa ka sur jong ka Synjuk Ki Rangbah Shnong ka Ri Bhoi District, ngi (Sorkar) la pynbeit ïa kane ka jingeh.”
