Shillong, Ïaïong 21
Ka Meghalaya Commercial Truck Owners & Drivers Association ka la kyntu ïa ki dkhot ba kin long kiba jynsur mynsiem ban pdiang lada pynïaid mano mano ban kit coke na Nongjri ban shalan sha Guwahati.
Haba ïakren bad u Bah Moslander Marngar uba dei u Chairman ka MCTODA u la ïathuh ba ki trok hapoh ka seng ki don palat saw hajar tylli kynthup naduh kiba kit dewbilat, kit mawshun, kit dieng, kit rnga, kit coke, kit khaw, tang kiba kit coke ha Nongjri ki la don palat shi hajar tylli hynrei haduh mynta kim pat lah ban kit namar ym pat lah ban ïapynbeit ïa ka pali ban kit.
U la ïathuh ba ma u, u dei tang u Chairman jong ka MCTODA hynrei lada kine ki trok kiba don la ka jong ka jingkit kiba la buh la ki nongkitkam ki don jingeh lada ki pyntip ka kynhun ka leit ban ïarap ïa ki.
U la ïathuh, haba nyngkong kiba kit coke ha Nongjri ki don tang 275 tylli hynrei mynta ki la poi palat shi hajar tam.
Shuh shuh u la ïathuh ba ka jingïakynduh jingeh ka dei namar ki nongñiah trok na South West Khasi Hills ki dawa kham bun lynti ban kit ïa u coke kaba la ktah ïa ki trok kiba don ha ka MCTODA.
Kumta u la kyntu ïa ki dkhot ka MCTODA lada pynïaid mano-mano na ki seng ne kynhun kin pdiang beit hynrei ki dei ban ïoh ïa ka bhah kaba ryntih ban ïa im lang da kaba ïaid ‘serial number’.
Kumban shu pynkynmaw ka Nongjri Area Trade Welfare Association kaba la long jingïalang ka la tyrwa ban khot jingïalang ïa ka MCTODA bad ïa ka South West Khasi Hills Truck Owners & Drivers Association kaba la ktah ïa ka jakpoh jong ki naduh ba la sangeh kit coke ha Nongjri.
