Nongstoiñ, Ïaïong 21
Ha ka miet shiteng synñia jong ka 21 tarik u Ïaïong, 2026 ha ki por kumba 1 baje eiei ka ‘erïong kaba jur bha kala khyrwit tyngeh ha ki katto katne ki shnong ha ka thaiñ Rambrai ha West Khasi Hills ha kaba la ong ba ha ka shnong Mawlangbah palat 20 tylli ki ïing ki la julor bad saw ngut ki briew na kawei ka longïing ki la mynsaw.
Haba pynthikna ïa kane u Sordar jong ka Shnong Mawlangbah jong ka thaiñ Rambrai u la ong ba ha kane ka jingwan ka ‘erïong ha ka Shnong Mawlangbah kila don palat 20 tylli ki ïing kiba la julor kynthup ïa ka ïingmane jong ka Balang Presbyterian Mawlangbah, ka ïing skul jong ka Mawlangbah LP bad kiba bun ki ïing briew kila julor bad kila pra.
Shuh shuh u la ïathuh ruh ba ha kane ka jingjia, saw ngut ki briew na kawei ka longïing kiba dei shi ïing shisem kynthup ïa ka kmie u kpa bad ar ngut ki khun kila mynsaw ha kaba mynta kila don hapdeng ka jingshah sumar hapoh Civil Hospital Nongstoiñ.
Kiba haïing jong kitei ki 4 ngut haba kren bad ki nongthoh khubor ki la ïathuh ba ka ‘erïong kala shu rong beit ïa ka ïing baroh kawei bad haba kila pyrshang ban wan pynkit sha hospital kila shah khang lynti ruh na ka jingkhyllem ki dieng ki siej ha surok bad kila poi noh ha ka por 4 baje mynstep sha Civil Hospital Nongstoiñ.
Shuh shuh ki la ïathuh ruh ba kiba mynsaw ki dei kiba la tip kyrteng kum u Bah Carmelius Lyngdoh, 37 snem ka rta, u Ribok Kharbani 13 snem ka rta, ka Kong Bisdalin Kharbani 30 snem ka rta bad u Shngainbor Kharbani 9 snem ka rta.
La ïathuh ruh ba ïa u kpa bad u Ribok Kharbani khun kila hap ban kit noh sha Shillong namar ka jingshitom kaba jur.
