Shillong, Ïaïong 21
U Symbud Myntri Rangbah ka Jylla, Bah Sniawbhalang Dhar u la ong ba ka National People’s Party (NPP) ka la pynkhreh bha na ka bynta ka ilekshon shiteng samoi sha ka Shillong Lok Sabha, bad la khmih lynti ba ka seng shen kan sa rai halor u kyrtong u ban mihkhmat ha kane ka kynti.
“Ngi la pynkhreh bha”, la ong u Bah Dhar ha ki nongthoh khubor ha ka Sngi Ba-ar haba jubab halor ka jingpynkhreh jong ka NPP.
Halor u kyrtong ka seng, u la ong, “Ngim pat rai halor kane. Ngin sa khot ïa ka jingïalang bad shim ïa ka rai mano ban long u kyrtong jong ngi. Shen, phin sa lah ban tip.”
“Ngi la jan ha ka ban pynbna ïa ka kyrteng jong u kyrtong”, u la bynrap.
U Bah Dhar u la ong ba ka jingpynslem ka dei namarba ki don bun ngut kiba angnud ban ïakhun na ka seng.
“Ki don bun kiba la wan shakhmat ban pan tiket na ka seng. Dei na kata ka daw ba ka shim por khyndiat ïa ngi ban pynbna ïa u kyrtong”, u la ong.
Haba kylli la ka rai jong ka BJP bad kiwei-kiwei ki seng ba ïatehlok ban pynïeng la ki jong ki kyrtong kan ktah ne em ïa ka NPP, u la ong, “Em, kan ym ktah namarba ki ïakhun katkum ki ‘vote bank’ jong ki. Kata kan ym buh jingeh. Lehse ka UDP kan pynïeng, lehse ka BJP kan pynïeng, lehse ka HSPDP kan pynïeng. Ym don kyrtong ïamon lang. Ngin ïakhun beit tang marwei.”
Halor ka Rajya Sabha, u Bah Dhar u la ong, “Ngin dang hap ban rai halor kane. Ka seng kan sa ïakren ïa kane ka kam bad kan rai da kawei ka sur halor kane.”
