Shillong, Ïaïong 21
U President ka United Democratic Party (UDP), Bah Metbah Lyngdoh ha ka Sngi Ba-ar u la ong ba ka seng kam pat shim rai haba ïadei bad ka jingpynïeng kyrtong na ka bynta ka ilekshon shiteng samoi sha ka Shillong Lok Sabha bad kan sa ïakren halor kane ka mat mynta ka taïew.
“Em, ïa mynta ngim pat rai. Kumba ka long mynta, ka seng kan sa shong ha kane ka taïew ban ïakren biang halor ka jingïaid shakhmat haba ïadei bad ka jingjied ïa u kyrtong,” ong u Bah Metbah haba kylli la ka UDP ka la rai ne em ïa u kyrtong.
U la kdew ruh ba ka Election Commission kam pat shym la pynbna ne pynbeit ïa ka tarik jong ka ilekshon.
“Haduh mynta ngim pat ïoh jingtip eiei ha kaba ïadei bad ka tarik ban pynbna ïa ka ilekshon,” u la ong.
Haba kylli halor ka jinglah ban kyrshan ïa u kyrtong ïamon lang, u Bah Metbah u la ong, “Kam don eiei kaba kum kata. Ngam don eiei ban ong.”
Halor ki khubor ba ki don katto-katne ngut ki nongmihkhmat jong ka seng kiba la ai jingmut ban ym ïakhun ïa ka ilekshon shiteng samoi ban wan, u la ong ba um pat ïoh ïa kino-kino ki jingtip halor kane.
“Em, ngam pat ïoh jingtip eiei halor kata. Ngim pat ïakynduh. Ngin sa rai hangta, kumno ban ïaid shakhmat”, u la ong.
