Shillong, Ïaïong 21
Ka Presbyterian Church of India (PCI) kaba kynthup ïa ki 12 tylli ki Synod kan sa rakhe ïa ka jingdap shispah snem naduh ba la seng ïa ka.
Ïa kane ka jingrakhe yn pdiang da ka Balang Presbyterian Mawlai Phudmuri kaba hap ha Khasi Jaiñtia Presbyterian Synod Sepngi ka ban sdang naduh 28 tarik Ïaïong, 2026 ban kut ha ka 3 tarik Jymmang, 2026.
Haba ïakren bad u Pastor BR Kharnaior uba dei u Senior Administrative Secretary PCI bad Chairman ka Balang Presbyterian Phudmuri u la ïathuh ba ka jingrakhe ïa ka jingdap 100 snem kan long ha ka 2 tarik Jymmang naduh ka por 10:30 mynstep ha madan heh Mawlai Phudmuri katba ka jingïaseng paidbah kan long ha ka 3 tarik Jymmang ha JN Stadium Polo.
U la ïathuh ba ki don palat 384 tylli ki ïing Khristan ki ban pdiang ïa ki 2500 ngut ki dkhot bad delegate na ki Synod bapher bapher kynthup ïa ki dkhot choir.
U la ïathuh ba ki don haduh 12 tylli ki Synod kiba hap ha PCI kata ka Biateram, Cachar Hill Tribes, Karbi Anglong, Khasi Jaiñtia Presbyterian Synod Mihngi, Sepngi, Pdeng, Ribhoi Synod, Manipur, Meitei, Mizoram, Tripura, Zou bad Tangphai.
Ha ka jingïaseng paidbah ha ka sngi U Blei por 10:30 mynstep ki ban ai choir ki long ka Standing Choir Biateram Synod, CHT Synod, KAPC Synod, Manipur Synod bad u nongkren u dei u Pastor LS Nongphlang.
Ha jingïaseng por 1:30 nohphai sngi ki ban ai choir ki long KJP Synod Mihngi, Mizoram Synod, KJP Synod Sepngi bad Balang Presbyterian Phudmuri bad u nongkren u Pastor DC Haia.
