Nongstoiñ, Ïaïong 22
Uwei u heprit u la khlad noh ha shen hadien ba u la shah thombor da kaba shah pom da ka wait bnoh ha la u jong u Kñi, katba u dang wan phai na skul.
Ha kaba ïadei bad kane ka jingjia, na ka liang u Superintendent of Police (SP) jong ka West Khasi Hills District u la ong ba katei ka jingjia kala jia hapoh ka shnong Umdang kaba hap hapoh ka thanad Shallang jong ka West Khasi Hills district, ha kaba uwei u heprit uba dang lai snem shiteng u la shah thombor haduh ban da ïap ha la u jong u Kñi jong u hi.
U SP u la ong ruh ba katei ka jingjia kala jia ha ka 22 tarik u Ïaïong ha ka por kumba 1:45 mynsngi ha ka por ba utei u heprit u dang wan phai na skul bad mar ïapoi hajan ka ïing sah jong u, u la shah thombor kynsan ha la u jong u Kñi da kaba shah pom da ka wait na ka khlieh haduh ba un da khlad hashen.
Nangta u la ong ruh ba utei u Kñi uba la leh ïa katei ka kam thombor ïa la u pyrsa u dei uba la tip kyrteng kum u Imphal Mawsor, 50 snem ka rta bad na ka liang ki pulit ka thanad Shallang, ha ryngkat u SDPO ka Mawshynrut kila leit bran bran sha katei ka jaka bad kem noh ïa utei u briew bad ki pulit ha ryngkat ka Forensic Crime Scene Unit ki dang pynlong ruh ïa ka jingtohkit kaba bniah halor katei ka jingjia.
Ïa ka met jong utei u heprit la pynkynriah noh sha Civil Hospital, Nongstoiñ ban leh ïa ka Post Mortem.
