Shillong, Ïaïong 22
U President ka Voice of the People Party (VPP) Bah Ardent M Basaiawmoit u la byrngem ban lum da ka jingïalang paidbah ban pynpoi haduh da ki lak ngut ban leit kerkut ïa ka Secretariat ban dawa na ka Sorkar Jylla ba kan pyntreikam ïa ki phra tylli ki mat.
Kane ka jingbyrngem u Bah Ardent ka dei ha ka jingïalang paidbah kaba la long ha ka sngi Balang ha Motphran ban pynsngewthuh ïa ki paidbah halor ki phra tylli ki mat.
U Bah Ardent u la ïawer ïa ki paidbah ba lada ki don ka jingkitkhlieh kin ïa mih paidbah ynda ka VPP ka la pynbna ïa ka tarik bad ka por ban leit tur sha Secretariat.
U la ong ba nangne shakhmat ka VPP kan leit man ki district ban leit pynshai sha ki paidbah ïa kine ki mat kiba donkam kumta u la kyntu ïa ka Sorkar ba kan dang pynkhreh lypa ban pyntreikam ïa kine ki jingdawa namar ki paidbah kin nym kynriah na Secretariat lada kim pat ïoh ïa kine ki jingdawa.
U la pyntip ba kine ki jingdawa ki long ban pyndam noh ïa ka projek ha Lumpongdeng, dei ban pynlong ki eksamin thungkam kiba khuid ba suba lyngba ki DSC bad MPSC, burom ïa ki nonghikai bad weng ïa ka jingpyrshah ïa ki nonghikai, sangeh ban thungkam ïa kiba la shongthait, dei ban ailad ïa ki samla, pynneh ïa ka khyndew jong u paidbah bad sangeh ban lilam ïa ka khyndew, khang ïa ka jingrung tuh ki mynder bad ïada ïa ki nongshong shnong ha khappud, sangeh ïa ki karkhana shna coke bad dewbilat bad ïada ïa ka koit ka khiah jong u paidbah, jurip bad beh noh ïa ki mynder kiba shong be-aiñ.
U la ïathuh haba u la wad jingtip ïa ki ar tylli ki hotel kiba don ha Shillong kata ka Vivanta bad Marriot, ka long khongpong kumba ka Sorkar ka la kam ban aikam ïa ki samla namar baroh ki kam kiba heh la bat da ki bar jylla katba ïa ka kam pynkhuid kamra la ai ha ki samla napoh ka Jylla kane ka dei ka kam pynbiej suda.
Shuh shuh u la ong ka seng saiñpyrthei kaba riewspah kaba dei na Meghalaya hynrei ka Jylla ka dang duk, u paidbah u dang thylli, kiba don ha NPP ki dang riewspah, ka por ka la dei ban ong em, namar ïa ka spah jong ka ri dei ban ïoh bynta lang.
“Nangne shakhmat lada ym pynduh ïa ki kali ïit ïong ngin ïa tah ïit ïong lang noh baroh, namar ban pynduh ïa ki ym lah, kumta ngi dei ban ïeng pyrshah da ka jaidbynriew, kumta u la kyntu ïa ka Sorkar ba ka dei ban leh hok ïa ka kam ba dei ban leh namar balei kiba don syndah bad phi kin pynkheiñ ïa ki kyndon,” u la ong.
U Bah Ardent u la ong ba ïa u Chairman ka Green Tech Foundation ki pulit ki ai ejahar, hynrei ki la leh aiu ïa uto uba byrngem ïa u nongñiah kali, hynrei um shym la pynksan ïa utei u nongñiah kali namar um tip aiu ki ïakren hynrei u kren ïa kaei kaba la ïohi ha rynsan social media.
Ha kajuh ka por u la ong lada jia ba ka VPP ka wan ha ka bor lada ki nongkyrshan ki leh katba mon, ka seng ïa uta u briew kan thep lang ïa u sha ruh.
