Shillong, Ïaïong 22
Ka Sorkar Meghalaya ka la kyrpad ïa ka Sorkar Pdeng ban siew ïa ka bai lutksan sha ki trai jaka na ka bynta ki jaka kiba hap shabar jong ka jingker sainar ha shi lynter khappud jong ka India-Bangladesh, da kaba ñiew ïa kane kum ka “mat kaba shong nongrim” kaba ktah ïa ka lad kamai-kajih.
Katkum ka jingïathuh u Symbud Myntri Rangbah ka Jylla ka tnad kam pohïing, Bah Prestone Tynsong, u pud u sam u bym pat ker sainar (ba dang sah) ha baroh kawei ka khappud India-Bangladesh ka long kumba 50 km tam ne duna.
“Ngi dang pyrshang katba lah ban pyntikna ker sainar noh ïa kane ka 50 km. Hynrei ki don ki jingeh kiba ngi ïakynduh,” u la ong ha ki nongthoh khubor.
U la ong ba ki trai jaka bad ki Rangbah Shnong ki la pyrshah ïa ki jingpynbeit ryntih haba ïadei bad ka jingker sainar kiba pynkynriah pat ïa ki jaka rep sha ka ‘No Man’s Land’.
“Don katto-katne ki trai jaka bad ki Rangbah Shnong ki la ong ba lada ka jingker sainar ka hap ban ïaid naduh nangne, kata kaba bun jong ka jaka ka hap ha ka ‘No Man’s Land’. Lada ka long kumta, te ka Sorkar India ka hap ban siew bai lutksan sha ngi wat na ka bynta kito ki jaka kiba hap shabar jong ka jingker sainar,” u la ong.
“Kata ka dei ka jingpyrshah na ki trai jaka. Kane ka mat ha ka jingshisha ka dei ka mat kaba dei hok bad ngi dang shimkhia ïa kane bad ka tnad kam pohïing ka Sorkar Pdeng ban pynsngewthuh ïa ka Sorkar India ba kan ym ïaid shakhmat bad ka jingsiew bai lutksan tang ha ki lynter lynti jong kito kiba pyntrei ïa ka jingker sainar, hynrei ka dei ban long ruh ïa ka jaka kaba don shabar jong ka jingker sainar – ki donkam ruh ban ai jingkheiñ ïa kane ka jingduhnong kaba ktah ïa ka lad kamai jong ki trai jaka bad ki paidbah ka Jylla.” bynrap u Bah Prestone.
Halor ki sienjam ba la shim katba ka jingeh haba ïadei bad ka jaka ym pat lah pynbeit, u la ong ba ka Sorkar Pdeng ka la pynkhlaiñ bha ïa ka jingpahara ha khappud.
“Nga tharai ba ka Sorkar India, ka tnad kam pohïing ka Sorkar Pdeng ka la pynmih ïa ka kyndon kaba pyrkhing bha sha ki bor pahara khappud kumjuh ïa ki Sorkar Jylla bapher-bapher ba kin kham shimkhia ban pyntikna ba kan ym don kano-kano ka jingwan rung be-aiñ ha baroh shi lynter jong ka khappud India-Bangladesh,” u la ong.
“Haba ïadei bad ki BSF, wat ïa ki bor pahara ba la phah shuh ruh, la phah sha kito ki jaka kiba don jingma,” ong u Bah Prestone.
