Shillong, Ïaïong 22
Ka Khasi Jaiñtia Government Contractor & Supplier Association (KJGC&SA) ha ka sngi Balang ka la leit ban pan jingshai na u Chief Engineer ka tnad Public Health Engineering (PHE) haba ïadei ka jingsahkut ka bill jingpyntrei ïa ka skhim Jal Jeevan Mission (JJM) bad kaba kot sha ka khatphra spah klur tyngka tam.
Haba kren sha ki nongthoh khubor u Bah F. D. Ramsiej Vice President KJGC&SA, u la ïathuh ba ki la ïoh ban ïakynduh ïa u Bah R. S Nongbri Chief Engineer jong ka tnad Public Health Engineering (PHE) u ba la pynshai ba ka jingbym ïoh bill ki nongtrei kontraktor ka skhim JJM ka dei na ka daw ba Sorkar Pdeng kam pat pyllait pisa sha ka Sorkar Jylla.
Shuh-shuh na ka liang u Bah Ramsiej u la pynpaw ka jingsngewkhia haba ïadei kane ka jingbym ïoh bill jong ki, kaba la pynlong ruh ïa ki ban kynduh jingeh ha ki ba bun bynta bad ki la kyntu ruh ïa ka Sorkar ba kan thaw lad ban pynïoh noh ïa ka pisa kaba dang sah, ym ban shu ap sah ïa ka jingpyllait pisa ka Sorkar Pdeng.
U Bah Ramsiej u la ïathuh ba u Chief Engineer u la ong ba haba ïadei bad kane un sa khot ïa ka jingïalang ha ryngkat u Myntri ka tnad PHE ban ïakren bniah halor kane ka kam.
Haba bynrap u Bah Banshan Lawai Assistant Secretary KJGC&SA u la ong ba ka skhim JJM ka long kum ka skhim politik jong ka Sorkar India, ba kan shu pynpawnam ïalade ha ka ilekshon 2024 katba haba la dep ka ilekshon, ha baroh kawei ka ri India ki bill ki la sahkut lut bad ba ka Sorkar ka pyrshang ban thet kti, da kaba wanrah ki kyndon bapher-bapher haduh ba ka tnad ka shem jingeh ban bud ryntih ïa ki kyndon ba la bthah.
