Shillong, Ïaïong 22
U Symbud Myntri Rangbah ka Jylla Bah Prestone Tynsong ha ka sngi Balang u la kyntait ïa ka jingdawa ban synshar noh da u Administrator ha Garo Hills Autonomous District Council (GHADC) haba pynpaw ba ka jingpynjlan ïa ka samoi treikam ka GHADC ka dei namar ka jingdonkam ban pynkylla ïa ka AD Rules hadien ba mih ka jingkulmar ba pyrshah ïa ka jingïoh ïashimbynta ki bar jylla ha ka ilekshon ka Council.
Haba jubab ïa ka jingdawa, u Bah Prestone u la ong, “Ai ba ngan batai shai bha ïa kane. Lada phi ong ba phim donkam ban pynjlan ïa ka jingtreikam jong ka District Council ha ka dur jong ki nongmihkhmat paidbah, ngan ïathuh ïa phi ba lada ka Sorkar ka shimti, ngi khot ka Synshar Administrator. Lada thung ïa u Administrator, kan don u pud ba u Administrator un mynjur ïa ki Bill namar kane ka ïadei bad ka jingpynkylla ïa ka Rules, pynkylla ïa ka Act”.
“Kumta, ngim lah ban shu ïakren ha katei ka rukom namar ka dei beit ka kam ban buh kyndon, ka kam ban pynkylla ïa ka rules bad ki kyndon. Ym don mano mano ruh ba lah ban leh ïa kane lait noh tang hapoh ka ïingdorbar thawaiñ jong ka District Council,” u la ong.
Haba kdew ïa kine ki jingtynjuh, u Bah Prestone u la ong ba ka Sorkar kam banse ban pynjlan ïa ka samoi treikam ka ïingdorbar.
“Kumta, haba buh hakhmat ïa kine ki jingeh ba ngi don, ngi la hap ban leh ïa kane, ta ka daw balei ka Sorkar ka hap ban pynjlan ïa ka ïingdorbar sa hynriew bnai khnang ba hapoh kane ka por, kin lah ban wanrah ïa ka amendment hapoh ka ïingdorbar bad ban shim ïa ka rai,” u la ong.
Ka jingpynjlan kala mih hadien ba mih ka jingïakynad kaba jur halor ka jingïoh ïashimbynta ki bar jylla ha ka ilekshon ka GHADC, kaba pynbor ban pynjlan shuwa ïa ka ilekshon, kaba la buh kham hashuwa ban long ha ka 10 tarik Ïaïong, ban plie lynti na ka bynta ban wanrah ïa ki jingpynkylla ïa ka AD Rules.
Halor ka Electoral Roll la ka jong, jong ka GHADC, u Bah Prestone u la ong ba ka Delimitation Committee ka dang leh ïa kane ka kam mynta.
“Ïa mynta, ka Delimitation Committee ki dang leh ïa kane ka kam. Ngam pat ïoh jingtip hynrei ha ka hukum, ngi la dep bthah ïa ki ba kin pyndep ïa kane ka kam hapoh ka lai bnai,” u la ong.
