Shillong, Ïaïong 23
U Nongïalam ka BJP uba dei ruh u MLA ka Pynthorumkhrah u Bah AL Hek u la ong ba ka seng ka thmu ban pynïar ïa ka jingtreikam ha kylleng ka jylla Meghalaya hashwa ka ilekshon sha ka ïingdorbar thawaiñ jong u snem 2028, da kaba buh thong ban jop haduh 15 ngut ki MLA, kynthup ïa san ngut na Shillong.
“La ka long ha sor Shillong, ha Rilum Khasi ne Rilum Jaiñtia, ngi thmu ban pynïar ïa ka BJP ha baroh kawei ka Jylla Meghalaya”, la ong u Bah Hek haba kren bad ki lad pathai khubor.
U la ong ba ki nongtrei jong ka seng ki dang trei ha madan ban pynkhlaiñ ïa ka seng.
“Baroh ki nongïalam ba rangbah bad ki nongtrei ka seng ki trei shitom bha ban poi sha baroh ki jaka bad ki konstitwensi khnang ba ha ka ilekshon 2028, ka BJP kan leh bha bha”, u la ong.
Haba kylli haduh katno ka BJP kan jop, u Bah Hek u la ong, ym duna ïa ka 10 lane haduh 15 ngut kin jop bad tang ha Shillong, kin jop haduh san ngut.”
Halor ka jingïakhun ha u snem 2028 kan long ne em hapdeng ka VPP bad ka BJP, u la ong ba un nym kheiñ sting ïa kiwei ki seng saiñpyrthei.
“Ngan nym kheiñ sting ïa kano kano ka seng saiñpyrthei, namar ka Congress ka don la ka jong ka lynti ban ïakhun, ka NPP ka don la ka jong ka lynti, ka VPP ka don la ka jong ka lynti hynrei ka BJP kan ïakhun, bad thikna ban jop 5 ngut na Shillong”, la ong u Bah Hek.
