Shillong, Ïaïong 23
Ha ka step jong ka sngi Palei, ka 23 tarik u Ïaïong 2026, ki paidbah kiba leit ïaid step ki la lap ïa uwei u briew u bym dei u Khasi uba la ïap ha u tyllai phasi ha syndah ka ATM 3 mer Upper Shillong.
U tei u briew u la ïap ha u tyllai phasi ha ryngkat bad ka shong bad kawei ka kti jong u ruh ka la bat eh ïa u pipe ba la shna bad ker, kaba la pynartatien ba u pynïap hi ne dei ba don ba pynïap dusmon ïa u.
Ki paidbah ki la pyntip sha ki nongïalam shnong bad hadien kata ki nongïalam shnong ki la pyntip noh mar-mar sha ki pulit ka Jhalupara Out Post.
Ki pulit ki la wan poi ha katei ka jaka ban peit bniah bad hadien katto katne por la wan poi noh ka kynhun Forensic Crime Scene Unit ban pynlong ïa ka jingtohkit kaba bniah ïa ka jingkhlad jong u tei u briew.
Hadien ba la pynhiar noh ïa ka met sha madan ha ka jingtokhit ki pulit ki la lap ba ki kot ki sla ki don lut ha ka met jong u tei u briew bad ka pisa ruh ka dang don. Katkum ki kot ki sla ba la sei da ki pulit la lap ba une u bar jylla u dei uba la tip kyrteng u Vinne Kumar Singh, ba 22 snem ka rta, bad u dei uba shong ba sah ha Riatsohkhlur Block-10 kaba danghap ha Nongkseh.
Ïa ka metïap jong u tei u bar jylla ki pulit ki la pynhiar noh na ka jaka sdien ha ka por 10:44 ei-ei mynstep.
Ïa ka met jong u Vinne Kumar Singh la rah noh sha NEIGRIHMS hospital ban leh ïa ka post mortem.
Haba ïoh ban ïakren bad u Bah Baniaidonbok Thangkhiew, dkhot ka VDP Nongkseh u la ïathuh ba katkum ki kot ki sla jong une u bar jylla ba lap ha u tyllai phasi u dei na Riatsohkhlur Block-10, kaba danghap ha Nongkseh.
U la ïathuh ba halor kane ka jingjia ki la ïoh ka phone call ha ka por 7 duna ei-ei mynstep ba pyntip ba la don u wei u briew ba ïap ha u tyllai phasi ha 3 mer bad hadien kata ki la pyntip sha ki nongïalam shnong bad pyntip noh ruh sha ki pulit ka Jhalupara Outpost ban pynlong ïa ka jingtohkit kaba bniah.
Haba kylli, u Bah Baniaidonbok u ong ba ïa une u briew ngim da kham ïohi bha bad ngim lah ban kynmaw ba u dei ba sah ha Riatsohkhlur. Da kaba bynrap “Ngim tip la don ka jingshah pynïap ne dei ba u pynïap hi”.
