Shillong, Ïaïong 23
U Superintendent of Police (SP) East Khasi Hills u Bah Vivek Syiem IPS, u la ïathuh ba ki Pulit ki la shimkhia ban ‘Chargesheet’ pyrshah ïa u Kennedy Khongsit hapoh 90 sngi.
Lah ban kdew ba ki Pulit ki la kem ïa u Kennedy Khongsit halor ka jingkynnoh donkti jong u ban pynïap ïa u heprit Kyrshanbor Khar-mudai ba sah ha Nongrah Lummyrboh bad ïa ka Kong Eilang Phawa ba sah ha Lawjynriew Nongthym-mai.
Haba kren sha ki nongthoh khubor u Bah Vivek u la ïathuh ba haduh mynta u Kennedy u don ha ka ‘Judicial Custody’ bad un ïai bteng ban don ha ‘Custody’ tad haduh ba la dep Charge-sheet.
U Bah Vivek u la ïathuh ba u nongshah kynnoh u Kennedy u la phla ïa ki kam pynïap briew bad u la ïalam bad pyni ruh ïa ki Pulit ïa ki jaka ba u leh ïa kine ki kam bymman. “Mynta u don ha Judicial Custody bad ha ka jingtohkit u la phla ïa kine ki kam pynïap briew nalor ba ula ïalam sha ki jaka ba u leh ïa ki kam bymman” la ong u SP.
U SP u la pynthikna ba ki Pulit kin Chargesheet pyrshah ïa u Kennedy hapoh 90 sngi ha baroh 2 tylli ki mukotduma pynïap briew.
