Shillong, Ïaïong 23
Ka Khun Hynñiewtrep National Awakening Movement (KHNAM) ha ka sngi Palei ka la leit ban ïakynduh ïa u Chief Secretary ka Jylla u Dr. Shakil P. Ahammed IAS ban pynpaw ba ka don ka jingthungkam bad weng kam katba mon ïa ki nongtrei bylla hapoh ka Secretariat Administra-tive Department Nazarat (SAD) kaba la lap katkum ka jingwad RTI.
Haba kren sha ki nongthoh khubor u Bah Thomas Passah Working President ka KHNAM u la ïathuh ba katkum ka RTI la shem ba ki ‘Casual Employees’ ki don kumba 139 ngut eiei kiba ka tnad ka siew tulop man la u bnai, katba haba peitbniah pat ha ka rukom thungkam, ïa kine ki nongtrei la shu thungkam bad weng kam katba mon.
Haba pynshai shuh-shuh u la ong ba, ka la don ka por ba la khot ïa ki ban trei tang lai bnai, hadien shi bnai la beh kam bad hadien saw bnai la khot trei biang, na kane u Bah Thomas u kynnoh ba ka rukom thungkam hapoh ka tnad kam long satia kaba ïaid beit ïaid ryntih.
U la ong ruh ba ki don ki kyrteng kiba don kumba 10 ngut ki dei kiba la trei slem bha ha ka kam, hynrei hadien jong u bnai Nailur 2025 ki khlem shah khot shuh ban trei, ha ka jingwad bniah la lap ba ka daw ka jingbym shah khot shuh jong ki ban trei ka long ba kine ki 10 ngut ki dei kiba la don bynta ha ka jingshong ïakhih ha madan Malki.
U la ïathuh katkum ka jinglap ka party ha u bnai Naiwieng jong u snem 2025 ka don ka jingduna ki nongtrei haba peit bniah katkum ka RTI kaba pyni ïa ka jingsiew tulop sha ki nongtrei, katba ha u bnai Kyllalyngkot ka la kiew biang ka jingdon ki nongtrei.
U Bah Thomas u la kynnoh ruh ba ka don ka jingïapher ha ka rukom thungkam ïa kiba trei ha kajuh ka kam, ha kaba don kiba hap ban ïaleh lyngba ki eksam, don kiba la shu khot khlem don kano-kano ka jingpeit bniah ne eksam, kaba u la ong ba kane ka rukom leh kam long kaba ïahap satia.
U pynpaw ka jingkyrmen ba u Chief Secretary un shimkhia haba ïadei bad kane ka jingthurmur ka thungkam thungjam ba kum kine ki ki rukom thungkam ba long pyrshah ïa ka jingsynshar khadar kin duh bad kin jah noh nangne shakhmat.
