Shillong, Ïaïong 23
U Bah Bryllyen Henry Syiemïong, Acting Syiem ka Hima Langrin u la mih shakhmat ban pynshai paidbah halor ka jingkynnoh u Bah PS Lyngdoh dangshen, ba ka Hima hapoh ka jingïalam u Bah Bryllyen Henry ki la ai wai beaiñ ïa ki mar ki mata jong ka Hima.
Haba kren sha ki lad pathai khubor ha ka sngi Palei jong ka taïew, u Bah Bryllyen Henry u la ong ba naduh u bnai Kyllalyngkot u snem 2026, ka Hima ka la pynlong ïa ka Executive Dorbar ha Phlangdiloin ban pynkhreh ban ai wai ïa ki mar ki mata ka Hima na ka bynta u snem 2026-27 bad ki la pan ruh ka jingmynjur na ka District Council, hynrei ka District Counncil ka slem ban ai ka jingmynjur bad ha ka 26 tarik bnai Lber ka District Council ka la ai bor ïa ki ban ai wai.
“Ka EC ka la phah jingpyntip kyrkieh ïa ki khun ki hajar ka Hima ba ha ka 30 tarik Lber kin ai wai ïa ki mar ka Hima, hynrei hadien kata ka la don ka jingujor u Bah PS Lyngdoh sha District Council da kaba ong ba katkum ka aiñ ka Hima Langrin lada ym pat dap 15 sngi ym pat long ban ai wai ïa ki mar ka Hima” u la ong.
U la ong ba katkum ka aiñ jong ka Hima ïa ki mar jong ka Hima dei ban ai wai hashuwa ka 30 tarik u Lber jong kano-kano ka snem bad ki nongshim wai kidei ban sdang naduh ka 01 tarik u Ïaïong. Kumta halor kata ka nongrim ki la phah jingtip kyrkieh noh sha ki khun ki hajar ka Hima ban ai wai ïa ki mar ka Hima.
U la ong ba ka District Council hadien kane ka la pynsangeh shuwa bad buh por ban ai wai ha ka 15 tarik Ïaïong bad na ka liang ka Hima ka la ïoh ban ai wai ïa ki mar ka Hima. Hynrei ha katei ka sngi u Bah PS Lyngdoh u la wan ban pynkulmar bad khang ïa ka ophis ka Hima hynrei hadien pat ka la jai-jai noh bad ki la ïoh ban ai wai da kaba suk ha katei ka sngi.
U Acting Syiem u la pynshai ruh ba “Ym don mano mano ba lah ban khang ïa ka hok jong ka Hima ban ai wai ïa ki mar ka Hima namar kadei ka hok naduh ki por ba mynshuwa.”
Shuh shuh halor ka jingkynnoh u Bah PS Lyngdoh ba u dei u Acting Syiem ba la shah weng, u Bah Bryllyen u la ong ba ka High Court ka la ai hukum ba un bteng biang ban long kum u Acting Syiem jong ka Hima Langrin tat haduh ban da pynbna da kum wei pat.
“Ngim tip u Bah PS Lyngdoh u kwah long Syiem ïalade ne u kwah ban rhah pisa bad ngim tip ïa kata hynrei na ka por sha ka por u ju wad ki daw bad wad ki lad ki lynti ba kumno ban pynkhyllem ïa ka EC hapoh ka jingïalam jong nga kum u Acting Syiem,” la bynrap shuh shuh u Bah Bryllyen Henry.
Kumta u la kyntu ïa ki paidbah ka Hima Langrin ba kim dei ban ngeit ne shaniah kulmar ïa u Bah PS Lyngdoh uba la ïalam bakla bad uba ju pynkulmar ïa ka shongsuk shongsaiñ ha ka Hima.
