Shillong, Ïaïong 23
U Joint Director ka tnad Civil Defence bad DIG ka SDRF Bah B Mukhim u la kyntu ïa ki paidbah ba kin ïatreilang bad ïashim bynta ha ka Mock Drill jong ka Air Raid bad ka Blackout ka ban long ha ka 24 tarik Ïaïong ban pynkhreh ïa ki nongshong shnong, lada ka Ri ka shah thombor ha ki nongshun.
“La kyrpad ïa ki paidbah ba kin sngewbha ban ïatreilang bad ban ïashim bynta ha ka Mock Drill ïa kaba la pynlong na ka bynta ka jingshngaiñ bad ban ïada ïa ka Ri,” ong u Bah B Mukhim.
Ïa ka Mock Drill kaba la ai kyrteng “ARMEX-1 2026? yn pynlong da ka tnad Directorate of Civil Defence & Home Guards, Meghalaya, hadien ka jingbthah da ka Ministry of Home Affairs ka Sorkar Pdeng.
Ïa kane ka Mock Drill yn pynlong ha baroh ki district jong ka Jylla bad yn shim bynta lang da ki shipai Air Force, Army, Police, SDRF, Home Guards, Civil Defence Wardens & Volunteers, Fire & Emergency Services, ka tnad ka koit ka khiah, ka tnad Bording, SDMA, DDMA, DIPR, ki Dorbar Shnong, NCC, NSS bad NYKS. Ïa ka ARMEX-1 2026 yn pynlong ha ar bynta.
“Ka STAGE I, ka kynthup ka jingwad ïa kiba mynsaw, ban pyllait im, ban ïakhun ïa ka ding, ka jingpynkynriah bad ka jingsumar ïa ki briew, ka STAGE II ka dei kumno ban pynkhreh lada sawa ka Air Raid Sirens bad ka jinglip Bording (Blackout), la ong u Bah B Mukhim.
Ka Stage I kan sdang naduh ka por 3 baje janmiet haduh 4 baje janmiet. “Ïa ka Siren jong ka Civil Defence yn pynsawa ha ka por 3 baje janmiet ha baroh ki district ka Jylla ban pyntip ba don ka Air Raid bad ka jingsdang ïa ka Mock Drill,” u la ong.
Ka siren kan sawa biang ha ka por 4 baje janmiet ban pyntip ba baroh la biang lut bad ka jingpynkut ïa ka Stage I. Ka Stage II, kata ka jingpynlong ïa ka Blackout kan ïaid naduh ka por 6:59 janmiet haduh 7:02 janmiet. “Ïa ka Siren jong ka Civil Defence yn pynsawa ha ka por 7 baje janmiet ban pyntip ba don ka Air Raid bad ka jingsdang jong ka Blackout,” u la ong.
“Nga kyrpad ïa ki paidbah ba sngewbha ban ïashim bynta lang ha ka Mock Drill da kaba pynlip noh ïa ki bording, ki inverter bad baroh ki jait jingshai jong ki,” u la bynrap.
“La pan ruh ïa ka jingïatreilang na baroh ki Dorbar Shnong, ki paidbah bad ki trai madan ïalehkai futsal na ka bynta ban pynlong ïa ka Blackout kaba jop.
Ka Blackout kan neh ar minit bad kan kut ha ka por 7:02 baje da kaba pynsawa ïa ka All-Clear Signal lyngba ka Siren jong ka Civil Defence,” la ong u Bah B Mukhim.
Kum shi bynta jong ka jingpynkhreh ban ïada ïa ka Ri, bad ïada ïa ki jingim jong ki riew paidbah ha ka por ba don ki jingïakynad bad ki thma, yn pynlong ïa ka Civil Defence Mock Drill halor ka Air Raid arsien man la u snem.
