Shillong, Ïaïong 23
U Commissioner & Secretary ba khmih ïa ka tnad Planning Development Dr Vijay Kumar D, u la batai bniah ïa ka rukom treikam bala pynbeit ryntih jong ka Jylla na ka bynta ka Sustainable Development Goal (SDG) ne ka thong jong ka roi ka par ba ïai neh, ha ka high level workshop ba pynlong ha State Convention Centre.
“Ngi la pynkha ia ki SDG Cell ha baroh ki District, thung ia ki District Research Fellow, bad shna ia ka Grassroot data network lyngba ka Village Date Volunteers,” ong u Dr Kumar haba ai jingkren ha kane ka workshop.
U la bynrap ba ka Jylla kala nang pynheh ïa ka CM Catalytic Fund ban pynbha ia ki jingmih na ka SDG, ha kaba man ki district kin ïoh mynta ïa ka grant kaba kot haduh T.1.5 klur na ka bynta ki kam bala buh ban leh.
Haba iai ban ia ka thong jong ka Sorkar, u Dr Kumar u la ong, “Ka thong jong ka Jylla ka long ban wan ha ka kyrdan top 10 hapoh ka Ri ha ka SDG hapoh u 2030 bad ha ka per capita income hashuwa u 2032”.
Ïa kane ka workshop la pynlong da ka tnad Planning, Investment Promotion & Sustainable Development, ha ryngkat ka jingïatreilang bad ka Indo-German Green and Sustainable Partnership (GSDP-GIZ), kaba pynleit jingmut ha ka jingsynshar bala pynïaid katkum ki jingkheiñ bad ka jingwanlang lang hajuh ïa ki jingshakri ha ki District.
Haba ai jingkren, u Secretary (PIP &SD) R Nainamalai ula pynïasnoh ïa ka jingïaid ka SDG bad ka ‘Viskit Meghalaya” Vission, kaba buh thong ban kynjoh ïa ka ïoh ka kot ba $10 billion hapoh u 2028 bad $100 billion hapoh u 2047.
“Ka Meghalaya ka dei kawei na ki katto katne ki Jylla kaba pyntreikam ïa ka mang tyngka kaba don jingïadei bad ka SDG ha kaban pynthikna ïa ka jingmih na ka roi ka par kiba lah ban shim jingkheiñ,” u la pynpaw.
U Nainamalai u la ong, ka Meghalaya kala ïai bteng ban pynneh ïa ka kyrdan “jinglah treikam bha” ha ka NITI Aayog SDG Index, kaba wan shakhmat ha ka liang ka um kaba khuid, ka jingpynduna ïa ka jingbym ïaryngkat kyrdan bad kaba shimkhia halor ka jinglong ka suiñbneng.
Ka East Khasi Hills kala ïoh ïa ka jingithuh kum ka District ba wan shakhmat eh ha ka jinglah treikam, kaba pyni ïa ka jingtreikam bha ka jingtynrong lem ïa ka bor ban plan ha ki bor district.
