Shillong, Ïaïong 24
Ka tnat Directorate of Civil Defence & Home Guards, Meghalaya, Shillong ha ka janmiet jong ka sngi Thohdieng ka la pynlong ïa ka Mock Drill ha kaba ïadei ka ‘Air Raid’ bad ka jingpynlip ïa ki bording (blackout) kaba la ai kyrteng “ARMEX-I 2026” bad kaba la leh ha baroh ki District Headquarter ka Jylla.
Ïa kane ka Mock Drill la pynlong ha ki ar bynta ban ai jinghikai ïa ki paidbah lada wan kino-kino ki jingshah hiarthma. Ha ka bynta ba nyngkong, la pynleit jingmut ha ki jingwad bad ban ai jingïarap ba kyrkieh ban pyllait im, ki jingai jingsumar, ka jingpynkynriah briew bad ïa kane ka Mock Drill la sdang ba pynlong naduh ka por 3 baje janmiet haduh ka por 4 baje janmiet.
“Ka siren jong ka Civil Defence ka la sawa ha ka por 3:00 baje janmiet ha baroh ki District ban ai dak ïa ka jingsdang jong ka Mock Drill bad ban pyni nuksa ïa ka jinghiar thma na suiñ (Air Raid)” ong ka Directorate.
Ha ka por 4:00 baje janmiet, la pynsawa biang ïa ka siren ban pyni ïa ka dak ba ym don jingma shuh (All Clear) bad ka jingpynkut ïa ka bynta ba nyngkong.
Ha ka bynta kaba ar la pynleit jingmut ha ka “jingsawa jong ki liengsuiñ bad ka jingpynlong ïa ka jingpynlip ïa ki bording (Blackout) bad ïa kane la pynlong naduh ka por 6:59 janmiet haduh ka por 7:02 baje janmiet.
Ha ka por 7:00 baje janmiet la pynsawa ïa ka siren jong ka Civil Defence ban ai dak ïa ka jinghiar thma liengsuiñ (Air Raid) bad ka jingsdang jong ka jingpynlip bording (Blackout).
Ka jingpynlip bording (Blackout) ka la neh ar minit bad la pynkut noh ha ka por 7:02 PM da ka jingsawa jong ka siren ba ym don eiei shuh (All Clear) kaba pyni ïa ka jingkut jong ka Mock Drill.
Ïa kane ka Mock Drill la pynlong ha kajuh ka por ha baroh ki District jong ka Jylla ban bishar bniah ïa ka jingpynkhreh bad ka jingïatreilang jong ka tnat Civil Defence ban ïada ïa ki paidbah lada wan kano-kano ka jingshah hiar thma hadien habud.
