Nongpoh, Ïaïong 24
Ha kawei ka jingjia ha ka miet Sngi Palei, kawei ka trok ‘Container’ kit Siej, ka la leit hap sha kawei ka riat kaba don ha khlieh shnong jong ka Ïewmawlong, Ri-Bhoi District kat haduh ba u nongñiah lem bad uwei pat u nongbud ki la mynsaw jur khamtam ha ki bynta jong ka kjat.
Katkum ka jingïoh jingtip, la ïathuh ba ka jinghap jong katei ka trok ka dei ha ka por 7-8 baje eiei mynmiet hadien ba u nongñiah um lah shuh ban tehlakam ïa katei ka kali bad ka la leit ban noh beit jlang sha katei ka riat.
Katei ka trok ka dei kaba la ñiah da u Bikash Thakur (21 snem ka rta) na Edhanpur Nangla bad ba la bud da u Mohit Chauhan (25 snem ka rta) na ka shnong Moradabad, kiba hap ha ka Jylla Uttar Pradesh.
Lyngba ka jingpoi kloi jong ki pulit ka thanad Nongpoh lem bad ki paidbah kiba sakhi ïa katei ka jingjia, la lah ban sei noh ïa kitei ki 2 ngut, kata u nongñiah bad nongbud napoh katei ka trok bad pynkit ïa ki sha Civil Hospital Nongpoh ban ïoh ïa ka jingsumar ba kyrkieh bad hadien kumba katto-katne por la pynkynriah noh ïa ki sha nongbah Shillong ban ïoh ïa ka jingsumar kaba kham paka namar ka jingjur jong ka jingmynsaw.
