Nongstoiñ, Ïaïong 24
Ha ka Sngi Thohdieng jong ka taïew, ka tnad pulit jong ka West Khasi Hills ka la ïoh ban pynkup burom ïa 13 tylli ki Village Defence Party (VDP) jong ka West Khasi Hills ba kynthup ïa ka VDPCNA.
Kitei ki 13 tylli ki VDP kiba la shah pynkup burom ki kynthup ïa ka Pyndengrei VDP, Siejlieh VDP, Nongsohpian VDP, Mawïong Lumsyntiew VDP, Nongpyndeng-Mawkhlam VDP, Nongryngkew – A VDP, Mawrusyiar VDP, Upper New Nongstoiñ VDP, New Nongstoiñ VDP, Tiehsaw Khyllem VDP, Nongkhroh Rambrai VDP, Upper Laitkseh VDP bad ka VDPCNA. U Superintendent of Police ka West Khasi Hills District, Bah H. Kharkongor u la ong ba katei ka jingpynkup burom ka long kum ka dak ban ai jingithuh ïa ka jingtrei shitom ka jong ki ban ïaleh pyrshah ïa ka jingma jong u drok, ban pynneh ïa ka jingsuk bad jingshngaiñ ha ki shnong ki thaw bad ha ka distrik hi baroh kawei.
Shuh shuh u la ong ba ka mynsiem jong ka jingïatreilang kaba la ai da ki VDP ka la wanrah ïa ka jingïajan bad ka jingïadei paidbah kaba bha hapdeng ki pulit bad ki paidbah hapoh ka distrik da ka jingthmu ban wanrah ïa ka shongsuk shongsaiñ.
