Shillong, Ïaïong 24
U President ka Meghalaya Pradesh Congress Committee (MPCC) u Bah Vincent H. Pala, u la kynnoh ba ka jingwanrah ka Bharatiya Janata Party (BJP) ïa ka Women’s Reservation Bill 2026 ka long biej namar ïa kane ka Bill la dep ban mynjur naduh u snem 2023, ïa kaba ka Sorkar NDA ba lam khmat da ka BJP ka khlem la pyntreikam satia.
“Ka jingwanrah jong ki myn ha kane ka dei ban pynbiej ban wanrah ïa ka Delimitation, ngi khlem pyrshah ïa ka Reservation Bill, hynrei ha kajuh ka por ki wanrah ïa ka Reservation bad ka Delimitation, ngi pyrshah ïa ka Delimitation namar ha Ri India ki don Northern State, ki Southern State, ki don ka Reservation na ka bynta ki Scheduled Castes, Scheduled Tribes, OBC bad kiwei” la ong u Bah Pala.
U Bah Pala u la kynnoh ba ka Bill ba ki wanrah ka khlem kren shai bad ka jingkwah jong ki ka long tang ïa kita kiba heh paid bad ïa ki heh jait, kam dei na ka bynta ki jaitbynriew ritpaid kiba donkam shisha ïa ka Reservation la ka dei ha ka pule puthi, ka ïohkam ïohjam bad ha ka kam saiñ hima kumjuh.
Shuh-shuh ruh la ong ba ka long shisha kaba eh ïa ki khun samla ban ïakhun ha ki eksam bapher-bapher lada ym don ka Reservation, ka Reservation ka dei ban shai khnang ba ki ritpaid kin ïoh ka lad kum ki nong India ha ka synshar paidbah ba la ai katkum ka riti synshar ka Ri.
U Bah Pala u la kynnoh ruh ba ka BJP ka ju jop ha ki ilekshon da kaba shu kular thok ïa ki paidbah, kumba ha ka Jylla Meghalaya, ka kular ban pynlait ïa u dewïong hapoh hynriew bnai bad kiba bun ki kam ba ka BJP ka kular thok, ha kaba u la ong, “Ki paidbah ka Meghalaya ki kham stad ban ïa ka BJP, namar ba ki tip ba ka party ka dei kaba shu kular tang da ki ktien, khlem ai kino-kino ki jingïada, kumta ki paidbah ka Jylla kim ju pynjop ïa ka BJP.”
Haba bynrap u la ong ba ka jingwanrah ïa ka Delimitation ka long ba ha ki por ba kham mynshuwa kiba bun ki SC, ST ki ïoh kam lyngba ka Reservation ha ki kam Sorkar, katba mynta ïa kine baroh ki la pynkylla noh da kaba la shu aiwai bad ai kontrak.
