Shillong, Ïaïong 24
U Bah Vincent H Pala, President ka Meghalaya Pradesh Congress Committee (MPCC), u la pynpaw ba u long ba pynkhreh ban ïakhun ha ka ilekshon MP shiteng samoi sha Lok Sabha na Shillong Parliamentary Constituency.
Haba kren sha ki nongthoh khubor u la pynpaw ba u la don ka jingkwah ban ailad noh ïa kiwei ban ïakhun sha kane ka ilekshon shiteng samoi, hynrei kiba bun ki nongkyrshan jong ka party ki kwah ïa u, ba un ïakhun ïa kane ka ilekshon kaba don mynta sa tang kumba 2 snem tam eiei.
U la ïathuh ba ka party haba ïadei bad kane ka bynta kan sa shong pyrkhat bha ha ka jingïadon lang ki nongïalam ka party ba na ki District bad ki Unit hapoh ar taïew ban shim ïa ka rai kaba thikna bad ban pan ka jingmynjur na ka All India Congress Committee.
“Lada ka party ka ong ïa nga ban ïaleh, ngan ïaleh bad lada ka party ka ong ban ailad noh sha kiwei, ngin ïa ailad” la ong u Bah Pala.
U Bah Pala u la pynpaw ruh ka jingkyrmen ba ka Congress kan kham suk ban jop ha kane ka ilekshon shiteng samoi namar ba ki paidbah ka Jylla mynta ki la sdang ban phai khmat biang sha ka party Congress.
Kum ban shu kdew ba yn pynlong ïa kane ka ilekshon MP shiteng samoi kadei hadien ka jingkhlad noh u Dr. Ricky AJ Syngkon, MP jong ka Voice of the People Party (VPP) ha u Rymphang 2026, u ba la pynliem ïa u Bah Pala ha ka ilekshon MP 2024.
