Shillong, Ïaïong 24
Ha ka step jong ka sngi Thohdieng, ka 24 tarik u Ïaïong 2026, ki pulit Bomb Squad ki la mareh bran-bran sha Laban hadien ba la ïoh jingtip ba la don kawei ka pla kaba la ieh ha kawei ka dukan.
Kane ka jingleit ki pulit Bomb Squad mar-mar sha katei ka jaka kadei ba la pynsuba jur ba katei ka pla ba la ieh dei ka pla ba don ïa u bomb ne ki tiar pynbthei.
Ki pulit Bomb Squad ha ryngkat ki ksew K-9, ki la rah ïa ki tiar ban pynshisha ba u dei shisha ne-em u bomb kaba don ha katei ka pla kaba la ieh ha katei ka dukan ha Laban.
Nyngkong ki pulit ki la pyndonkam shuwa ïa ki ksew K-9 ban phah sma bad hadien kata pat ki la shim da u tyllai ban tan ïa katei ka pla.
Ha kane ka step ki pulit ki la khang lut ïa ki kali bad ïa ki paidbah ban nym shah shuh ban ïaid lyngba katei ka surok bad kane ka pla ka don jngai kumba 100 metre na Laban Police Station.
Haba ïakren bad u Secretary ka Laban, u Bah Raja Lyngdoh Nongpyiur u la ïathuh ba ïa ka pla ba suba don bomb la lap nyngkong eh da ki nongshong shnong kiba leit bret ñiut.
U la ïathuh ba hadien ba ki pulit ba peit bniah ïa u bomb ki la poi ha katei ka jaka ki la lap ba hapoh katei ka pla, ki don ki jaiñ phong kiba khuid bad ki shabi hynrei ym pat lah ban pynthikna ba kadei ka pla jongno bad mano ba la ieh ha katei ka jaka.
“Ïa kane ka pla la lap naduh ka por 7 baje eiei mynstep da ki nongbret ñiut,” la ïathuh u Bah Raja.
