Shillong, Ïaïong 24
U Director ka DREAM Bah Francis Kharshïing ha ka sngi Thohdieng u la ong ba ka Drug Reduction Elimination & Action Mission (DREAM) kan nang pynkhlaiñ ïa ka jingïalap ban pynsngewthuh ïa ki paidbah ban pyrshah drok bad ban ïakren ha ka ban seng ïa ki Rehabilitation Centre ha kylleng ka Rilum Garo.
“Ka DREAM ka la shim ïa bun ki lad shakri kiba kongsan ha kylleng ka Rilum Garo ha ka 23 bad 24 tarik u Ïaïong 2026, kaba nang pynskhem ïa ka jingkut jingmut jong ka ban wanrah ïa ka jingïatreilang ban ïakhun pyrshah ïa u drok ha ryngkat ki shnong ki thaw,” la ong u Bah Francis.Ha ka 23 tarik u Ïaïong, ka DREAM ka la leit ban jurip ïa ka jaka ban tei ïa ka Rehabilitation Centre ha West Garo Hills, ka ban seng da ka Baptist Church. Kane ka jingthmu ka dei ka dak jong ka sienjam kaba kongsan ban pynkhlaiñ ïa ki jingtei jong ki Rehabilitation Centre ha ka thaiñ lyngba ka jingïatreilang bad ki kynhun Balang.
Mynta ka sngi, u Director ka DREAM u la pynïaid ïa ka jingïalang High Level hapoh ophis u Superintendent of Police, West Garo Hills, Tura.
Ha kane ka jingïalang la wan ïashim bynta da u Deputy Inspector General of Police, Western Range, Deputy Commissioner, Superintendent of Police ka West Garo Hills, District Social Welfare Officer, ki NGO ba ïatreilang hapoh ka DREAM bad ki nongmihkhmat na ki Balang bad ki sengbhalang na baroh ki District ka Rilum Garo.
“Ka jingïalang ka la pynleit halor ka jingpynkhlaiñ ïa ki lad treikam da ka jingïatreilang, ban pyniar ïa ki jingthmu ka DREAM hapoh ka thaiñ,” ong u Bah Francis. U la ban jur ban pynïar ïa ka jylli treikam ki kynhun ba don bynta ban pynkhlaiñ ïa ki jingïalap pyrshah drok bad pynkloi ïa ka jingseng ïa ki Rehabilitation Centre ha kylleng ka Rilum Garo.
