Shillong, Ïaïong 24
Ka State Women’s Wing jong ka Voice of the People Party (VPP) ha ka 24 tarik Ïaiong, 2026, ka la leit ban aiti ïa ka shithi ha ka Kong Ïamon -lang Syiem, Chairper-son ka Meghalaya State Commission for Women’s (MSCW) kum ka dak ban pan jingshai halor ka jingïohi ïa ka jingdon bun ki site kiba ïadei bad ki kam die met ha ka Jylla Meghalaya kaba ki da pynbna ha ka kyrteng ka Nongbah Shillong kaba ktah ïa ka jinglong jingman ki kynthei ka Jylla.
Ha ka shithi ba la thoh, la ong ba la lah ban sakhi ïa ka jingdon jong ki site bad ki advertisement kum ka lovilo.in, kaba pynshlur ïa ki kam beaiñ ha ka dur jong ka ‘escort service’, kaba pyni ïa ka jingkiew ka kam die met ha ka Jylla.
“Ki kynthei kiba register ha katei ka site kaba ïadei bad kane ka kam, ka jur bha bad kaba lah ban sngewthuh ba kiba don bynta ha katei ka kam, ki ju ïalam ïa ki customer ha ki five star hotel,” la ong ka VPP SWW ha ka shithi ba la phah sha ka Chairperson.
Ka VPP SWW ka la bynrap ruh ba ka long kaei-kaei kaba sngewkhia ba la ka la don ne-em kano-kano ka jingshimkhia ban tehlakam halor ka jingpyndonkam bakla ïa ki rynsan social media ha kum kine ki bynta kiba lah ban pynkylla pat ïa ka Shillong kum ka Sex City.
Na ka liang ka VPP Women’s Wing ka la bynrap ruh da kaba kylli “Hato ka Commission ka don jingtip ne-em ïa ka jingdon kum kine ki site ha ki rynsan social media ha Jylla Meghalaya bad lada tip, kaei ka sienjam kaba ka la shim halor kane ka bynta,”?.
Ka la buh jingkylli ruh ba hato ka Commission ka la lum jingtip ne-em ïa ka jingdon jong ki kynthei kiba don ha kane ka kam awria?.
Namarkata, ka VPP State Women’s Wing, haba pan jingpynshai na ka MSCW ka la buh ka jingdawa ban ïamir jingmut bad kiba ïadei bad ka aiñ ban lap bad ban weng noh ïa kum kine ki website, khnang ba kan ym ktah pat ïa kiwei pat ki kynthei.
