Jowai, Ïaïong 24
Ki pulit ka West Jaiñtia Hills ki la ïoh ban kurup noh ïa ki artylli ki ‘Scooty’ ba shah tuh na ka shnong Pdengshakap bad kem noh ïa 5 ngut kiba donkti ba kynthup ïa 4 ngut ki khynnah hadien ka jingtohkit kaba la sdang na Ïalong Civil Hospital.
Ka Additional Superintendent of Police (DSB), ka Kong C.W. Lyngdoh ha u kyrwoh ba la pyllait ha ka 24 tarik Ïaïong ka la ong ba ki pulit ki la ïoh pdiang ïa ka ‘phone call’ ha ka 23 tarik Ïaïong na u Bah Wanphida O. Laloo na ka shnong Ummulong uba la pyntip ba ka ‘Scooty’ jong u kaba don ïa u nombor ML-05 W-6877 ka la shah tuh na Ïalong Civil Hospital, Jowai.
Hadien ka jingbishar bniah lyngba ki CCTV ki pulit ki la ithuh ïa kawei ka kali ba la pyndonkam da ki runar ha kaba ki la pynlong mardor ïa ka jingthwet tad haduh ban da ïoh bat ïa kane ka kali bad rah noh ïa kine ki 5 ngut kynthup ïa 4 ngut ki khynnah sha Phramer Traffic Cell, WJH na ka bynta ban pynlong ïa ka jingtohkit, ka la ong.
Lyngba ka jingphla jong uwei na kine ki khynnah uba la ju donkti teng ha ki kam bymman, ki pulit ki la hiar sha ka shnong Pdengshakap bad ïoh ban kurup noh ïa katei ka ‘Scooty’ bad hadien la pyndep ïa baroh ki jingdonkam katkum ka aiñ, ka la ong.
Ha kane kajuh ka sngi ki pulit ki la ïoh pdiang ïa ka jingujor na u Bah Bastanroy Mawthoh uba dei na Nongmensong, Langkyrding uba pyntip halor ka jingshah tuh ka ‘Scooty’ Yamaha Ray ZR, kaba don ïa u nombor ML05-AF-5040 ha ka por 2:30 mynsngi.
Ïa baroh kine ki artylli ki ‘Scooty’ ba la ïoh kurup na ka shnong Pdengshakap la wanrah noh da ki pulit sha Phramer Traffic Cell ban leh ïa kaba donkam, ong ka kyrwoh. Kane ka heh pulit ka la kyntu ruh ïa ki nongshong shnong ba kin long kiba phikir bad ban pyntikna ba ki kali jong ki ki don ha ki jaka kiba shngaiñ bad ruh ban pyntip mardor sha ki thanad ba marjan lada don kino-kino ki jingsuba lane da kaba ‘phone’ sha u nombor 112.
