Shillong, Ïaïong 24
Ki paidbah ka shnong Huroi bad Lahaleiñ kaba hap ha East Jaiñtia Hills ki la pynpaw ha u Waheh Shnong ba kin ym pat shah ban jurip ïa ka surok ‘High Speed Corridor’ katba ka Jaiñtia Hills Autonomous District Council (JHADC) kam pat lah ban pyndam noh ïa ka shnong Umpyrshin.
Haba ïakren bad u Waheh Shnong ka Huroi, Bah Raja Suchen u la ïathuh ba ka jingmih kane ka shnong thymmai ka lah ban dei namar ka jingwan ka surok ‘High Speed Corridor’, kumta ki paidbah ki la pynpaw ba kin ym shah ban jurip lada ym pat lah ban pynduh ïa kane ka shnong thymmai kaba mih na ka shnong Huroi.
U la ïathuh ba ka shnong Huroi bad Lahaleiñ ka don palat 9 kilomitar ka jingjrong ka surok hynrei haduh mynta ka Sorkar ka dang wan thew jaka tang arsien.
Shuh shuh u la ïathuh ba ka Tribunal jong ka JHADC kan sa khot ïa ka jingïalang ha ka 29 tarik mynta u bnai ha Jowai, kumta ki ar shnong – kata ka Huroi bad Lahaleiñ kin sa shong jingïalang lashai ka Sngi Saitjaiñ ban shim ïa ka rai.
“Ngi hap ban shim ïa ka sur jong ki paidbah hashwa ba ngin leit sha ka jingïalang ba la khot ka Tribunal namar haduh mynta ka JHADC ka dang sngap jar-jar ïa kane ka jingdawa jong ngi naduh ba ngi la leit tur sha ophis ka JHADC sha Jowai,” u la ong.
U la ïathuh ba ka shnong Lahaleiñ ka don 100 ïing tam bad ka Huroi ka don 400 ïing tam katba kane ka shnong kaba pynkha jubor na ka shnong Huroi ka don 70 ïing hynrei tang 20 ïing kiba kyrshan ïa ka jingai Sanad ka JHADC ïa u Johnny Suchen.
