Mawkyrwat, Ïaïong 26
U MLA ka Mawkyrwat, u Bah Renikton L Tongkhar ha ryngkat u Executive Engineer ka tnad PHE, Mawkyrwat Division, u Bah K. Nongbsaw, ki nongïalam shnong na ki 5 tylli ki shnong ka dong Riwar, kata, ka Manad, Mawbidong, Lummawbah, Pyndenlyngdoh bad Pyndensohlang lem bad kiwei de ki ophisar ka tnad PHE, ha ka 24 tarik u Ïaïong, 2026 ki la hiar jurip ïa ki tyllong um jong kitei ki san tylli ki shnong kiba don ha Wah Umthot, Mawten hadien ba la ïoh jingujor halor ka jingbym biang um ha shnong Mawbidong bad shnong Manad.
Haba kren sha ki lad pathai khubor, u Bah Renik u la pynpaw ka jingsngewkmen ba ha katei ka jingleit jurip, na ka liang jong u Bah K Nongbsaw u la ong, ba ka tnad PHE kan sa pynbha ïa katei ka tyllong um jong ka shnong Manad bad Mawbidong bad kumjuh ruh ban pynkylla ïa ka lain jong ki pipe um khnang ban ailad ïa ka um ba kan kham khlain ba kan thikna ka jingïoh um.
U Bah Renik u la pynpaw ruh ïa ka jingkmen ba kam shym la don kano kano ka jingthut ha ka jingai um ïa kitei ki lai tylli kiwei pat ki shnong, kata ka Lummawbah, Pyndenlyngdoh bad Pyndensohlang, bad u la pynpaw ruh ka jingkyrmen ba lyngba ka jingpynkylla ïa ka lain jong u pipe u, kitei ki ar tylli ki shnong kin ïoh pura noh ïa ka um baroh 24 kynta kumba long lem kiwei ki shnong.
