Shillong, Ïaïong 26
U President ka Meghalaya Pradesh Congress Committee (MPCC) u Bah Vincent H. Pala u la pynpaw ïa ka jingkmen ban ïohi ha kine ki khyndiat sngi ba la dep, ba ka Sorkar ka la shim ïa ka rai ban ithuh ktien Sorkar noh ïa ka ktien Khasi bad Garo hapoh ka Jylla.
Haba kren halor kane u Bah Pala u la ong ba kane ka jingshim rai ka jong ka Sorkar ban ithuh ktien Sorkar ïa kine ki artylli ki ktien kan kham pynkhlaiñ ïa ka jingïakhun ban pynrung ïa ka ktien Khasi bad Garo hapoh ka Khyrnit ba Phra jong ka riti synshar ka Ri India.
“Ha ka por ba nga ïa kynduh ïa u Myntri ka tnad Kam Pohïing ka ri, u ong ïa nga, wat ha ka Jylla Meghalaya ki khlem ithuh ktien Sorkar ïa ka ktien Khasi ne Garo, kumno me kwah ban kren hapoh Parliament ne ban ïoh jingithuh,” la ong u Bah Pala.
Shuh-shuh u la bynrap ba u trei shitom naduh mynshwa na bynta kane, u la phah jingthoh bad u la pynrung ïa ka bill ha ïingdorbar thawaiñ, ha kaba u la banjur ïa ka jingdonkam ban ithuh noh ïa kine ki ktien.
U Bah Pala u la pynpaw ïa ka jingkyrmen ba kane ka rai jong ka Sorkar kan lah ban pynurlong ïa ka mat jingdawa na ka bynta ban ïoh jingithuh noh ha ka ri ïa ki Khasi bad Garo.
