Jowai, Ïaïong 26
Hadien ka jingshah khanglad na ka por sha ka por ha ki pulit Assam bad ki paid Karbi ban leit sha ki lyngkha rep, ka Dorbar Shnong Lapangap ha ka 25 tarik Ïaïong kala lum da ka jingïalang Dorbar Shnong.
Haba ïakren bad u waheh shnong ka Lapangap u Ma Deimonmi Lyndoh u la ïathuh ba ka dorbar kala rai ban dawa ïa ka Jaiñtia Hills Autonomous District Council bad ïa ka Sorkar Meghalaya ba kin ïa pynbeit ïa ki jingeh jong ki nongrep ka shnong Lapangap hapoh ka 30 tarik Ïaïong.
“Lada ka District Council bad ka Sorkar Jylla kim lah ban pynbeit ïa kane ka jingeh ki nongshong shnong, ngim banse ban leit aiti noh ïa ki pata khyndew sha ka Jaiñtia Hills Autonomous District Council (JHADC) namar ym myntoi ban don ki kot pata khlem da ïoh ban leit rep leit riang da kaba suk kaba sain,” la ong u Ma Deimonmi Lyngdoh.
U la ong ba ki nongshong shnong ka Lapangap kila dawa ruh na ka Sorkar Meghalaya ban beh noh mardor ïa ki pulit Assam kiba shong beaiñ ha u Lum Pynthor, lym kumta ki nongshong shnong kin mih paidbah ban leit tur sha Secretariat.
Kila dawa ruh na ka Sorkar Meghalaya ban pyndam ïa u GPS Line ba la pruid da ka Sorkar Assam katba ym pat dep ïa ka jingïapynbeit ïa u pud u sam hapdeng ka Sorkar Meghalaya bad ka Sorkar Assam bad ban thwet ïa ki runar kiba donkti ban pynïap ïa u Tellmi Talang.
