Shillong, Ïaïong 26
U Bah Khroo Pariat, President Khooid Ya Ka Wah Myntdu, u la pynpaw ïa ka jingsngew bynñiaw halor ka jingkren jong u Bah Jamshaphrang Pohtam, MDC ka Jaiñtia Hills Autonomous District Council (JHADC) na War Central Constituency, kaba dang shen ha ka jingïalang ka Voice of the People Party (VPP) ha Motphran, uba la ong ba ka Wah Myntdu ka la ïap.
U Bah Khroo u la pynpaw ka jingsngewsih jur halor ka jingkren jong u MDC ka VPP.
Haba kren sha ki lad pathai khubor, u Bah Khroo, u la ong ba ka Wah Myntdu haduh mynta ka dang ai ka umbam umdih bad kaba dang pynim ruh ïa ki doh um doh wah.
U la ong ba kum u MDC um dei ban kren kulmar tang ban myntoi ïalade lane ban ïoh jingmyntoi ïa ka Party.
“Ïa nga hi shimet bad ïa ki paidbah kiba sah marjan bad ka Wah Myntdu ka la ktah jur halor ka jingkren jong u MDC ka VPP. Kane ka jingkren jong u Bah Jamshaphrang ka la ktah shisha namar u ong ba ka Wah Myntdu ka la ïap, katba ngi ki paidbah pat ngi dangïoh ka umbam umdih bad baroh ki dohkha kiba don lyngba ka Wah Myntdu ki dangim baroh,” la bynrap u Bah Khroo.
U la ban jur ruh ban ong “Kum u MDC ba don ka jingkitkhlieh na ka bynta ki trai ri trai muluk lyngba ka JHADC uba la don ha ka bor, ha jingshisha um dei ban kren ïa kum kine ki kyntien ban ong ka Wah Myntdu ka la ïap”.
U la kynthoh ruh ba wat ju leh politik hynrei dei ban leh politik kaba sngewtynnad lang u paidbah nongshong shnong ban im bad ban shngaiñ, ym pat ban pynïap ïa kiba dangim.
“Wat leh tang ban ïoh jingmyntoi shimet ne ban ïoh jingmyntoi ka party ba phi don,” la bynrap biang u Bah Khroo.
