Shillong, Ïaïong 26
Hadien ba la mih ka jingshah kynthoh ïa ki pulit ka Jylla Meghalaya ha kiba bun balang, halor ka jingjia shah byrngem siat pistol bad shah shoh u nongñiah kali kamai sumo ha uwei u briew, na ka liang u Bah Disparsing Rani, u la wad jingtip lyngba ka Right To Information (RTI) halor kane ka bynta.
Hadien ka jingïohpdiang ïa ka jubab, na ka liang u Bah Disparsing u nongwad RTI ha ka 25 tarik u Ïaïong, 2026, u la wan poi ha Shillong Press Club, ban pynshai haba ïadei bad ka jubab kaba u la ïohpdiang lyngba ka RTI.
Haba kren sha ki lad pathai khubor, u Bah Disparsing, u la ong ba ki pulit ki la shim Suo Moto pyrshah ïa uba byrngem hynrei kaba lyngngoh pat ka long ba na ka liang uba shah shoh pat um ai kano-kano ka jingujor pyrshah ïa u nong byrngem.
U la ong ba katkum ka jinglap jong u, ba uba shah shoh, um nud ban ujor ejahar namar ba u la sei da u nar bad dei hadien kane ba uba byrngem u sa sei pat ïa ka pistol, kum ka jingïada ïalade.
“Ha ka jingïa kajia haba don uba pyni da ki tiar kiwei ruh ki hap sei lang da ki tiar ka ban long ka jingïada ïalade,” la bynrap u Bah Disparsing.
Nalor kata, u la ong ruh ba haba ïadei bad ka jingpyndonkam bakla ïa ka pistol, na ka liang u Superintendent of Police u la pynshai, ba un thoh sha ka magistor ba dei ban pynduh noh.
Haba ïadei bad ka jingbym ujor uba shah byrngem, u Bah Disparsing u ong “Ka lah ban dei ba u la dep sei da u nar na ka kali, namar lada u ujor ejahar pyrshah ïa u tei u briew uba shoh, uba shoh ruh un ujor lang namar ba u la sei da u nar pynmynsaw”.
U Bah Disparsing u la kyntu ïa baroh ki nongñiah kali kamai ba lada jia kano-kano ha surok bad wan kano-kano ka huri hura, kim dei ban pyni tiar bad lada don ka jingeh hapdeng surok, kidei ban leit beit sha Police Station.
“Ïa mynta hi ka don tang ka suo moto na ki pulit pyrshah ïa u briew uba la byrngem ban sei pistol ïa u nongñiah kali kamai sumo,” la bynrap biang u Bah Disparsing.
