Shillong, Ïaïong 26
Arngut ki samla kila khlad noh, hadien ba ka arshaka kaba ki shong kala leit tynrah ïa kawei ka trok, kaba la jia ha ka sngi Saitjaiñ ha ka surokbah National Highway kaba don ha 15 Mer, Byrnihat.
Katkum ka khubor ba la ïohlum, la ïathuh ba kane ka jingjia, kala jia ha ka por 5 baje eiei ha kaba kawei ka arshaka kaba khlem don number kaba la ñiah da u Nikunja Boro na Rongpur Sankardev, Hojai bad uwei pat uba shong nadien u Riki Amchi namar ka jingpynher sted kila leit tynrah nadien ïa kawei ka trok kaba don ïa u number ML11-A-1367 kaba la ñiah da u Prakesh Paudel na Lum Nongrim, Umsning.
La ïathuh ruh, ba ha katei ka jingjia tyngkhuh ka arshaka, u Riki u la khlad hashen katba u Nikunja uba ñiah ïa ka arshaka u la khlad noh shwa ban poi ha ka jaka ai jingsumar ha Guwahati.
Ki pulit ka thanad Byrnihat ryngkat ki nongtrei ka NHAI kila pynkit noh ïa ka met jong uba khlad ha shen sha Nongpoh Civil Hospital ban leh ïa ka post mortem bad ka jingtohkit ka dang ïaid shakhmat.
